پی ڈی ایم کی تحریک ملک کے اقوام وعوام کو ہر قسم کی مشکلات سے نجات کی جانب بنیاد ثابت ہوگی،پاکستان ڈیموکریٹک موومنٹ ضلع پشین

پشین(اُردو پوائنٹ اخبارتازہ ترین - آن لائن۔ 19 اکتوبر2020ء) پاکستان ڈیموکریٹک موومنٹ ضلع پشین کے رہنمائوں نے کہا ہے کہ پی ڈی ایم کی تحریک ملک کے اقوام وعوام کو ہر قسم کی مشکلات سے نجات کی جانب بنیاد ثابت ہوگی اور اس تحریک کو کامیابی سے ہمکنار کرنے کیلئے کسی قسم کی قربانی سے دریغ نہیں کرینگے ۔ ان خیالات کا اظہار پی ڈی ایم ضلع پشین کے اجلاس کے انعقاد کے بعد جاری کردہ بیان میں کیا گیا ہے ۔

پی ڈی ایم کا اجلاس عوامی نیشنل پارٹی ضلع پشین کے ضلعی صدر عبدالباری کاکڑ کی زیر صدارت باچا خان مرکز پشین میں منعقد ہوا۔ جس میں25اکتوبرکے جلسے کی کامیابی کیلئے مختلف امور اور تجاویز کا جائزہ لیا گیا اور فیصلے کیئے گئے اور کمیٹی تشکیل دی گئی۔ بیان میں پی ڈی ایم کے گوجرانوالہ او رکراچی کے کامیاب جلسوں پر مسرت کا اظہار کرتے ہوئے اسے پی ڈی ایم کی تحریک کے ساتھ عوام کی وابستگی کا ثبوت قرار دیا گیا اور کہا گیا ہے کہ غریب عوام کو ہر شعبہ زندگی میں سخت ترین مشکلات کا سامنا ہے ، بدترین مہنگائی بیروزگاری اور غربت نے جھکڑ کررکھا ہے جبکہ پی ڈی ایم کی آزادانہ شفاف انتخابات ،حقیقی جمہوریت کی بحالی ، آئین وقانون کی حکمرانی ، پارلیمنٹ کی بالادستی ، اور مہنگائی وبیروزگاری کیخلاف جدوجہد قابل تحسین ہے ۔

(جاری ہے)

اجلاس میں پشتونخوامیپ کے صوبائی سیکرٹری اطلاعات محمد عیسیٰ روشان ، علی محمد کلیوال ، حاجی اکبر ، نصیر ننگیال ،جمعیت علمائے اسلام کے مفتی عبدالکریم ، پیپلز پارٹی کے نادر خان کاکڑ ، مسلم لیگ ن کے علی اللہ اور اے این پی کے اصغر خان ترین ، عبید اللہ عابد، صادق کاکڑ اور عبدالباری کاکڑ نے شرکت کی۔