جج ویڈیو اسکینڈل،ناصر بٹ کا نام انتہائی مطلوب دہشت گردوں کی فہرست میں شامل

جمعرات 12 نومبر 2020 15:40

اسلام آباد (اُردو پوائنٹ اخبارتازہ ترین - این این آئی۔ 12 نومبر2020ء) وفاقی تحقیقاتی ایجنسی (ایف آئی ای) نے جج ارشد ملک ویڈیو اسکینڈل میں مفرور ملزمان ناصر بٹ اور میاں سلیم رضا کے نام انتہائی مطلوب دہشت گردوں کی فہرست میں شامل کر لیے۔

(جاری ہے)

ایف آئی اے کی جانب سے جاری ریڈ بک میں 1210 افراد کو انتہائی مطلوب دہشت گرد قرار دیا گیا ہے،ایف آئی اے نے اس فہرست میں جج ارشد ملک ویڈیو اسکینڈل کے مرکزی ملزمان ناصر بٹ اور میاں سلیم رضا کو بھی انتہائی مطلوب دہشت گرد قرار دیا ہے۔

خیال رہے کہ ایف آئی اے نے انسداد دہشت گردی اسلام آباد کی عدالت میں بھی ناصر بٹ اور میاں سلیم رضا کے نام انتہائی مطلوب دہشت گردوں کی فہرست میں شامل کرنے کی درخواست دائر کی تھی تاہم عدالت نے یہ کہہ کر ایف آئی اے کی درخواست مسترد کر دی تھی کہ یہ معاملہ سائبر کرائم کے زمرے میں آتا ہے،اس کے علاوہ ایف آئی اے نے بانی متحدہ الطاف حسین کا نام بھی ریڈ بک میں شامل کر لیا ۔