معیشت کی بہتری کی خبریں مفاد پرست ٹولے پر گراں گزر رہی ہیں ،ڈاکٹر شہباز گِل

تمام سرکاری اداروں کو گروی رکھوا کر اپنے ذاتی اثاثے 90 گنا تک بڑھانے والے آج معیشت پر بات کر تے ہوئے شرم کریں، معاون خصوصی

منگل 24 نومبر 2020 17:03

معیشت کی بہتری کی خبریں مفاد پرست ٹولے پر گراں گزر رہی ہیں ،ڈاکٹر شہباز ..

اسلام آباد (اُردو پوائنٹ اخبارتازہ ترین - این این آئی۔ 24 نومبر2020ء) معاون خصوصی برائے سیاسی ابلاغ ڈاکٹر شہباز گِل نے مریم اورنگزیب کے بیان پر ردعمل کا اظہار کرتے ہوئے کہا ہے کہ معیشت کی بہتری کی خبریں مفاد پرست ٹولے پر گراں گزر رہی ہیں ۔ اپنے بیان میں ڈاکٹر شہباز گِل نے کہاکہ (ن )لیگ کے دور میں صرف شریفوں کے کاروبار میں ترقی ہوئی، صبح شام معیشت کے دگرگوں حالات کا رونا وہ روتے ہیں جو خود خرابی کے ذمہ دار ہیں،جہاں مریم اورنگزیب اور احسن اقبال معیشت پر بھاشن دیں اس پارٹی کا معیشت سے کیا لینا دینا۔

معاون خصوصی نے کہاکہ تمام سرکاری اداروں کو گروی رکھوا کر اپنے ذاتی اثاثے 90 گنا تک بڑھانے والے آج معیشت پر بات کر تے ہوئے شرم کریں، پاکستان کی معیشت مسلسل بہتر ہورہی ہے۔

(جاری ہے)

معاون خصوصی نے کہاکہ تجارتی خسارہ مسلسل کم ہورہا ہے اور صنعتی پیداوار میں مضبوط نمو نظر آ رہی ہے، آپ نسل در نسل خاندانی غلامی سے نکل کر تعصب کی عینک اتار کر ملک کو ترقی کرتا دیکھیں، پاکستان تحریکِ انصاف نے اقتدار سنبھالا تو کرنٹ اکاؤنٹ ماہانہ 2 ارب ڈالر خسارہ ملا تھا،ملک کا کرنٹ اکاؤنٹ مسلسل چوتھے ماہ اکتوبر میں بھی سرپلس رہا، اکتوبر کے مہینے میں کرنٹ اکاؤنٹ 38کروڑ 20 لاکھ ڈالر سرپلس رہا۔

ڈاکٹر شہباز گِل کے مطابق جولائی سے اب تک مجموعی طور پر کرنٹ اکاؤنٹ سرپلس ایک ارب 20 کروڑ ڈالر تک پہنچ گیا ہے، پاکستان سٹاک ایکسچینج کا تجارتی حجم 4 سال کی بلند ترین سطح پر ہے، فارن ڈائریکٹ انویسمنٹ میں پچھلے سال کے مقابلے میں جولائی سے اکتوبر 2020 کے دوران 9.1 فیصد اضافہ ہوا اور اب 733 ملین ڈالر ہے۔