بلاول بھٹو کی پشاور میں پی ڈی ایم جلسے کے بعد سے طبیعت ناساز، کورونا کے آثار نمایاں

بلاول بھٹو شاید ہمشیرہ بختاور بھٹو کی منگنی میں بھی پرسوں شریک نہ ہوں۔ صحافی کامران خان کا ٹویٹ

سمیرا فقیرحسین بدھ 25 نومبر 2020 15:42

بلاول بھٹو کی پشاور میں پی ڈی ایم جلسے کے بعد سے طبیعت ناساز، کورونا ..

اسلام آباد (اُردو پوائنٹ تازہ ترین اخبار۔ 25 نومبر 2020ء) : چئیرمین پاکستان پیپلز پارٹی بلاول بھٹو زرداری کی خود کو قرنطینہ کرنے کی خبریں گذشتہ روز سے ہی گردش کر رہی تھیں تاہم صحافی و تجزیہ کار کامران خان نے مائیکروبلاگنگ ویب سائٹ ٹویٹر پر اپنے پیغام میں کہا کہ کوئی سرکاری تصدیق نہیں لیکن بلاول ہاؤس زرائع سے ٹھوس خبریں گردش کررہی ہیں کہ بلاول بھٹو کی پشاور میں پی ڈی ایم جلسے کے بعد سے طبعیت ناساز ہے، کورونا آثار نمایاں ہے۔

انہوں نے کہا کہ اگلے 14 روز وہ سخت isolation میں گزاریں گے ، اور شاید وہ ہمشیرہ بختاور بھٹو کی منگنی میں بھی پرسوں شریک نہ ہوں۔

کوئی سرکاری تصدیق نہیں لیکن بلاول ہاؤس زرائع سے ٹھوس خبریں گردش کررہی ہیں کہ بلاول بھٹو کی پشاور PDM جلسے کے بعد سے طبعیت ناساز ہے کورونا آثار نمایاں ہے اگلے 14 روز وہ سخت isolation میں گزاریں گے شائید ہمشیرہ کی منگنی میں بھی پرسوں شریک نہ ہوں
— Kamran Khan (@AajKamranKhan) November 25, 2020

یاد رہے کہ گذشتہ رات یہ خبر آئی تھی کہ قریبی ساتھی میں کرونا تشخیص کے بعد بلاول بھٹو نے خود کو قرنطینہ کر لیا ہے۔

(جاری ہے)

میڈیا رپورٹس کے مطابق ترجمان بلاول ہاؤس جمیل سومرو کا کورونا ٹیسٹ مثبت آیا، جمیل سومرو میں کورونا وائرس کی تشخیص کے بعد پیپلز پارٹی کے چئیرمین اور دیگر کچھ رہنماؤں نے فوری خود کو قرنطینہ کر لیا ۔

بلاول بھٹو اور دیگر پی پی رہنما اگلے چند روز تنہائی میں گزاریں گے۔ بتایا گیا کہ جمیل سومرو عمومی طور پر ہر وقت بلاول بھٹو زرداری کے ساتھ رہتے ہیں، اسی لیے حالیہ کچھ روز کے دوران ان کے ساتھ ملاقات کرنے والے تمام افراد نے خود کو قرنطینہ کر لیا ہے۔ بلاول بھٹو اور دیگر پی پی رہنماؤں نے اپنے کورونا ٹیسٹ بھی کروائے ہیں، جن کی رپورٹ کا انتظار کیا جا رہا ہے۔

تاہم اب صحافی و تجزیہ کار کامران خان نے بلاول ہاؤس ذرائع کے حوالے سے چئیرمین پاکستان پیپلز پارٹی بلاول بھٹو زرداری کو کورونا ہونے کا دعویٰ کیا ہے۔ یہاں یہ بات قابل ذکر ہے کہ پاکستان پیپلزپارٹی کے شریک چئیرمین اور سابق صدر آصف علی زرداری اور شہید محترمہ بینظیر بھٹو کی صاحبزادی بختاور بھٹو کی منگنی کی تقریب 27 نومبر کو ہو گی ۔ اس حوالے سے مہمانوں کو دعوت دینے کے لیے ایک خصوصی کارڈ جاری کیا گیا تھا جس پر تحریر تھا کہ تقریب میں شرکت کرنے کے لیے کورونا ٹیسٹ لازمی کروانا ہوگا ۔

مدعو کیے گئے مہمانوں کو ہدایات کی گئیں کہ وہ تقریب سے 24 گھنٹے قبل اپنے کورونا نیگیٹو ٹیسٹ کی رپورٹ بلاول ہاؤس میں جمع کروائیں گے اور جن مہمانوں کی رپورٹ نیگیٹو ہو گی صرف وہی تقریب میں شرکت کر سکیں گے۔ تاہم آج صبح ہی بختاور بھٹو کی منگنی کی تقریب میں مہمانوں کو محدود کرنے کا فیصلہ بھی کیا گیا تھا۔ منگنی کی تقریب میں صرف 80 کے قریب افراد شریک ہوں گے جن میں قریبی دوست احباب اور رشتہ دار شامل ہیں جبکہ پارٹی رہنما اور عہدیدار بھی منگنی کی تقریب میں شرکت نہیں کریں گے۔