پاکستان سمیت دنیا بھر میں یوٹیوب، جی میل سمیت گوگل سروسز اچانک بند

پیر 14 دسمبر 2020 21:47

نیویارک(اُردو پوائنٹ اخبارتازہ ترین - این این آئی۔ 14 دسمبر2020ء) پاکستان سمیت دنیا بھر میں یوٹیوب، جی میل، گوگل اسسسٹنٹ اور گوگل ڈاکس سمیت انٹرنیٹ سرچ انجن گوگل کی متعدد سروسز اچانک بند ہوگئی ہیں اور صارفین ان سروسز تک رسائی حاصل نہیں کرپارہے۔عالمی میڈیا رپورٹ کے مطابق ڈاؤن ڈیٹیکٹر نے عندیہ دیا ہے کہ گوگل کے کاروبار اور پرسنل سروسز کو متاثر کرنے والی بندش جی میل میں ایسٹرن ٹائم(ای ٹی) کے مطابق صبح 6 بج کر 40 منٹ (پاکستانی وقت کے مطابق شام ساڑھے 4 بجی) کے قریب شروع ہوئی تاہم گوگل کی جانب سے اب تک اس مسئلے پر باضابطہ پر کوئی بیان سامنے نہیں آیا لیکن گوگل کی سروسز پیج کے مطابق ان کی تمام سروسز کو مشکلات کا سامنا ہے۔

دوسری جانب ٹوئٹر پر رپورٹس ہیں کہ صارفین جی میل کے علاوہ گوگل کی بنیادی سروسز تک رسائی حاصل نہیں کرپارہے اور اس حوالے سے #YouTubeDOWN کا ہیش ٹیگ بھی ٹرینڈ کررہا تھا۔

(جاری ہے)

اس دوران یوٹیوب کے ہوم پیج پر ایک کارٹون دکھائی دے رہا تھا جس پر سم تھینگ وینٹ رانگ جبکہ یوٹیوب ایپ استعمال کرنے والے صارفین کو مختلف ایررز کا سامنا رہا۔علاوہ ازیں پاکستان میں بھی یوٹیوب، جی میل سمیت گوگل سروسز متاثر ہونے کے بعد اس حوالے سے مختلف ہیش ٹیگز بھی ٹرینڈ کررہے تھے۔

یوٹیوب صارفین کے علاوہ وہ کمپنیاں جو گوگل ورک پلیس پر انحصار کرتی ہیں ان کے صارفین کے مطابق گوگل اسسٹنٹ سے مربوط اسمارٹ ہوم گیجٹس کے استعمال میں بھی مشکلات پیش آرہی تھیں۔علاوہ ازیں گوگل کی بیک اینڈ سروسز پر انحصار کرنے والی تھرڈ پارٹی ایپلی کیشنز اور سروسز بھی بظاہر متاثر ہوئیں۔ڈاؤن ڈیٹیکٹر نے رپورٹ کیا ہے کہ پوکیمون گو گیم تک بھی رسائی میں مشکلات سامنا رہا تاہم متعدد گوگل سروسز متاثر ہونے کے باوجود، گوگل کا بنیادی سرچ پروڈکٹ تاحال فعال ہے اور تھرڈ پارٹی اشتہارات بھی چل رہے تھے۔

اس وقت پوری دنیا میں بظاہر گوگل سروسز متاثر ہیں، دی ورج کی رپورٹ کے مطابق انہیں امریکا، برطانیہ، نیدرلینڈ اور جاپان میں سرچ انجن کی تمام سروسز بند ہونے کی مصدقہ اطلاعات موصول ہوئی ہیں۔دوسری جانب ڈاؤن ڈیٹیکٹر کا کہنا ہے کہ گوگل سروسز متاثر ہونے کی اطلاعات دنیا بھر سے آرہی ہیں۔کرسبین جوزف میتھیو نامی صارف نے لکھا کہ وہ دن بھی آگیا جب ہم گوگل تک رسائی حاصل نہیں کرپارہے، گوگل کے ساتھ کیا ہوا۔انہوں نے لکھا کہ یہ 2020 ہے، اس سال کچھ بھی ٹھیک نہیں ہے۔