وزیراعظم کی دیوالی پرہندو برادری کو مبارک باد

حکومت ہر کمیونٹی کو مساوی حقوق اور ترقی کے یکساں مواقع فراہم کرنے کا عزم کیے ہوئے ہے، شہبازشریف

پیر 20 اکتوبر 2025 12:41

وزیراعظم کی دیوالی پرہندو برادری کو مبارک باد

اسلام آباد (اُردو پوائنٹ اخبارتازہ ترین - این این آئی۔ 20 اکتوبر2025ء) وزیر اعظم محمد شہباز شریف نے دیوالی پر ہندو برادری کو مبارک باد دیتے ہوئے کہا ہے کہ حکومت ہر کمیونٹی کو اس کے عقائد سے قطع نظر مساوی حقوق اور ترقی کے یکساں مواقع فراہم کرنے کا عزم کئے ہوئے ہے۔وزیر اعظم آفس کے میڈیا ونگ کی طرف سے جاری بیان کے مطابق وزیر اعظم نے پاکستان سمیت دنیا بھر میں موجود ہندو برادری کو دیوالی کی مبارک باد دیتے ہوئے کہا کہ دیوالی روشنیوں کا تہوار ہے اور روشنی کی تاریکی پر اور امید کی مایوسی پر فتح کے جشن کی عکاسی کرتا ہے۔

وزیر اعظم نے کہا کہ دیوالی مناتے وقت آئیں ہم سب مل کر مستقبل کو مثبت سوچ اور اتحاد کے نظریے سے دیکھیں۔ وزیر اعظم نے کہا کہ پاکستانی ہونے کے ناطے ہم اپنے معاشرے میں تنوع پر فخر کرتے ہیں جو ہمارے قومی دھارے کو مزید مضبوط بناتا ہے اور ہماری مشترکہ ثقافت کو تقویت بخشتا ہے۔

(جاری ہے)

وزیر اعظم نے کہا کہ اس موقع پر وہ پاکستان میں ہندو برادری کی گراں قدر خدمات کو خراج تحسین پیش کرتے ہیں جن کا ہمارے سماجی، اقتصادی اور سیاسی شعبوں میں کردار ہماری قوم کو مضبوط بنا رہا ہے۔

انہوں نے کہا کہ پاکستان میں عقائد کا تنوع ہمارے لوگوں کے درمیان اتحاد کا حقیقی ذریعہ ہے، ہندو اور دیگر اقلیتی برادریوں سے تعلق رکھنے والے پاکستانیوں کو اپنے ملک کی ترقی کے لیے اپنے مسلمان بہن بھائیوں کے ساتھ شانہ بشانہ کام کرتے ہوئے دیکھ کر مجھے بے حد خوشی ہوتی ہے۔ وزیر اعظم نے کہا کہ بابائے قوم قائداعظم محمد علی جناح نے ایک ایسے پاکستان کا تصور دیا تھا جہاں تمام برادریوں کو بلا تفریق مذہب، نسل یا ذات کی برابری اور آزادی حاصل ہو، حکومت ان اقدار کو برقرار رکھنے اور اس بات کو یقینی بنانے کے لیے پرعزم ہے کہ پاکستان میں ہر کمیونٹی کو ان کے عقائد سے قطع نظر مساوی حقوق اور یکساں ترقی کے مواقع حاصل ہوں۔

انہوں نے ہندو برادری کیلئے نیک خواہشات کا اظہار کرتے ہوئے کہا کہ روشنیوں کا یہ تہوار ان کی زندگیوں میں امن اور خوشحالی لائے اور ہمارے ملک میں تمام مذاہب کے لوگوں کے درمیان اتحاد اور بھائی چارے کے مضبوط رشتوں کو پروان چڑھائے۔