علی ظفر کا محمد علی سد پارہ کو خراج تحسین

پاکستانی گلوگار نے کے ٹو سر کرتے ہوئے کوہ پیما علی سد پارہ کی بہادری کی یاد میں ’’تم چلے آؤ پہاڑوں کی قسم‘‘ گانا ریلیز کیا

ذیشان مہتاب جمعرات 18 فروری 2021 11:27

علی ظفر کا محمد علی سد پارہ کو خراج تحسین

لاہور (اردو پوائنٹ تازہ ترین اخبار ۔ 18 فروری 2021ء ) نامور اداکار و گلوکارعلی ظفر نے کے ٹو سر کرنے کی مہم کے دوران لاپتہ ہونے والے عالمی شہرت یافتہ کوہ پیما محمد علی سد پارہ کی بہادری کی یاد میں گانا ریلیز کیا ہے۔ گلوکارعلی ظفر نے آڈیو گانا ’’تم چلے آؤ پہاڑوں کی قسم‘‘ گا کر 44 سالہ علی سدپارہ کو خراج تحسین پیش کیا ہے۔

My tribute to an unsung hero. “Paharon Ki Qasam.” #AliSadpara https://t.co/UJTluIg09P
— Ali Zafar (@AliZafarsays) February 17, 2021

میڈیا سے گفگتو میں گلوکار علی ظفر کا کہنا تھا کہ اپنے ہیروز کو عزت دیئے بغیر کوئی بھی قوم ترقی نہیں کر سکتی ہے، علی سد پارہ ایک غیر معمولی ہیرو تھے جنہوں نے اپنی زندگی کا خطرہ مول لے کر پاکستان کے لیے غیر معمولی کامیابیاں حاصل کیں۔

انہوں نے کہا کہ میں کم سے کم پاکستان کے اس ہیرو کے لیے ایک گانا تو گا سکتا تھا، تاکہ جب تک موسیقی رہے علی سد پارہ ہماری یادوں سے جڑے رہیں۔

(جاری ہے)

یاد رہے کہ ’تم چلے آؤ پہاڑوں کی قسم‘ گانے پر محمد علی سدپارہ کے ڈانس کی ویڈیو کچھ عرصہ قبل سوشل میڈیا پر وائرل ہوگئی تھی۔ خیال رہے کہ دنیا کے دوسرے بلند ترین پہاڑ کے ٹو کو سردیوں میں سر کرنے کی مہم پر جانے والے پاکستانی کوہ پیما محمد علی سد پارہ اور دیگر دو کوہ پیماؤں کو لاپتہ ہوئے 13 دن سے زائد ہوگئے ہیں۔ لاپتہ ہونے والے کوہ پیماؤں کی تلاش کے لیے پاکستان آرمی ایوی ایشن ، پاک فضائیہ اور دیگر بین الاقوامی اداروں کی جانب سے کیے جانے والے سرچ آپریشن میں اب تک تینوں کوہ پیمائوں کا سراغ لگانے کی تمام تر کوششیں ناکام رہی ہیں۔