یونس خان سپنرز کو مجھ سے بہتر کھیلتے تھے، چیتشور پجارا کا اعتراف

یونس خان ٹیسٹ کرکٹ میں پاکستان کے لیے سب سے زیادہ رنز بنانے والے بلے باز ہیں

ذیشان مہتاب جمعرات 19 جون 2025 14:34

یونس خان سپنرز کو مجھ سے بہتر کھیلتے تھے، چیتشور پجارا کا اعتراف

لاہور (اردو پوائنٹ تازہ ترین اخبار ۔ 19 جون 2025ء ) ہندوستان کے ٹیسٹ بلے باز چیتشور پجارا نے پاکستان کے سابق کپتان یونس خان کو خود سے بہتر اسپنرز کا کھلاڑی تسلیم کیا ہے۔

ایک کرکٹ میڈیا آؤٹ لیٹ کے ذریعہ انسٹاگرام پر شیئر کیے گئے ایک ویڈیو سیگمنٹ میں 103 ٹیسٹ میچز میں بھارت کی نمائندگی کرنے والے بیٹر سے کسی ایسے بلے باز کا نام لینے کو کہا گیا تھا جسے وہ اسپن بولنگ کے خلاف اپنے سے برتر سمجھتے تھے۔

ان کے سامنے مشفیق الرحیم، ڈیوڈ وارنر، ڈین ایلگر، راس ٹیلر، جونی بیرسٹو، روہت شرما اور اے بی ڈی ویلیئرز سمیت مختلف نامور نام لیے گئے مگر وہ خاموش رہے۔

جو روٹ کے بارے میں پوچھے جانے پر انہوں نے ایک محتاط "شاید" کہا لیکن اسپن کے بہتر کھلاڑی کے طور پر انگلینڈ کے اسٹار کی مکمل تائید نہیں کی۔

(جاری ہے)

جب ویرات کوہلی کا نام آیا تو دائیں ہاتھ کے بیٹر نے اسپن کے خلاف اپنے ساتھی کی طاقت کا اعتراف کیا۔

انہوں نے کہا کہ "کوہلی کو میں اپنی برابری پر کہوں گا، اعدادوشمار بتاتے ہیں کہ وہ اسپن کے اچھے کھلاڑی ہیں"۔

سٹیو سمتھ اور کین ولیمسن کے بارے میں بات کرتے ہوئے چتیشور پجارا نے خاص طور پر بھارت کے خلاف ان کی کارکردگی کی تعریف کی لیکن تجویز دی کہ اسپن کھیل کے تناظر میں موازنہ مشکل ہے۔

چتیشور پجارا نے کہا کہ "انہوں نے ہندوستان کے خلاف رنز بنائے ہیں اور ان کے نمبر اچھے ہیں لیکن میں نہیں جانتا کہ جب اسپن کی بات آتی ہے تو اپنے آپ سے موازنہ کرنا بہت مشکل ہے لیکن وہ معیاری کھلاڑی ہیں۔

تاہم جب یونس خان کا نام آیا تو 37 سالہ بیٹر نے کوئی ہچکچاہٹ محسوس نہیں کی۔

انہوں نے اعتراف کیا کہ "یونس خان کے بارے میں مجھے یہ کہنا پڑے گا کہ وہ مجھ سے بہتر ہے"۔

پاکستانی لیجنڈ بیٹر ٹیسٹ تاریخ میں ملک کے سب سے زیادہ رنز بنانے والے اور فارمیٹ میں 10,000 رنز کو عبور کرنے والے واحد پاکستانی بلے باز ہیں۔

انہوں نے 118 ٹیسٹ میچوں میں 52.06 کی اوسط سے 10,099 رنز بنائے جس میں 34 سنچریاں شامل ہیں۔