کاٹن کی قلت، یارن کی انتہائی زائد قیمت، ٹیکسٹائل انڈسٹری کی پیداواری سرگرمیاں رکاوٹ کا شکار

یارن، کاٹن پر عائد ڈیوٹیز ختم کی جائیں، بھارت ،دیگرممالک سے ڈیوٹی فری درآمد کی اجازت دی جائے، حنیف لاکھانی،فرحان اشرفی برآمدی آرڈرز کی بروقت تکمیل نہ ہوئی تو بیرونی دنیامیں پاکستان کی ساکھ خراب ہوگی، نئے آرڈرزبھی نہیں ملیں گے،پاکستان یارن مرچنٹس

بدھ 3 مارچ 2021 17:07

کاٹن کی قلت، یارن کی انتہائی زائد قیمت، ٹیکسٹائل انڈسٹری کی پیداواری ..

کراچی (اُردو پوائنٹ اخبارتازہ ترین - این این آئی۔ 03 مارچ2021ء) پاکستان یارن مرچنٹس ایسوسی ایشن( پائما) کے سینئر وائس چیئرمین محمد حنیف لاکھانی، وائس چیئرمین فرحان اشرفی نے ٹیکسٹائل انڈسٹری کے بنیادی خام مال کاٹن یارن کی عدم دستیابی اور قیمت تاریخ کی بلند ترین سطح پر پہنچنے پر گہری تشویش کا اظہار کرتے ہوئے حکومت سے درخواست کی ہے کہ ملکی معیشت میں ریڑھ کی ہڈی کی حیثیت رکھنے والی ٹیکسٹائل انڈسٹری کو تباہ ہونے سے بچانے کے لیے فوری طور پر بھارت سمیت دیگر ممالک سے یارن اور کاٹن کی ڈیوٹی فری درآمد کی اجازت دی جائے تاکہ برآمدی آرڈرز کی بروقت تکمیل کی جاسکے بصورت دیگر پرانے آرڈرز منسوخ ہونے کے ساتھ ساتھ بیرونی دنیامیں پاکستان کی ساکھ بری طرح متاثر ہوگی اور غیر ملکی خریدار پاکستانی برآمدکنندگان کو نئے آرڈرز بھی نہیں دیں گے۔

(جاری ہے)

ایک بیان میں پائما کے عہدیداروں نے کہا کہ کورونا وبا کے اثرات کے باعث بڑی تعداد میں چین، بنگلہ دیش اور بھارت کے برآمدی آرڈرز پاکستانی برآمدکنندگان کو منتقل ہوئے جس کی وجہ سے پیداواری سرگرمیوں میں تیزی آئی تاہم اِن دنوں ٹیکسٹائل انڈسٹری کوپیداوری طلب کے مطابق خام مال نہ ملنے اور مقامی مارکیٹوںمیں یارن کی قیمت انتہائی بلند سطح پر پہنچنے سے لاگت میں بہت زیادہ اضافہ ہوگیا ہے لہٰذااگر اس کا نعم البدل دوسرے ممالک سے تلاش کرتے ہوئے بھارت سمیت دیگر ممالک سے خام مال کی درآمد ات کا انتظام نہ کیا توجو برآمدی آرڈرز پاکستان کو منتقل ہوئے ہیں وہ پورے نہیںکیے جاسکیں گے جس سے بیرونی دنیا میں پاکستان کی ساکھ خراب ہوگی اور ہمیںنئے آرڈرز بھی نہیں ملیں گے۔

حنیف لاکھانی اور فرحان اشرفی نے حکومت سے یارن، کاٹن پر عائد ڈیوٹیز فوری ختم کرنے اور بھارت سمیت دیگر ممالک سے ڈیوٹی فری درآمد کی اجازت دینے کا مطالبہ کرتے ہوئے کہاکہ بھارت سے درآمدی یارن دیگر ممالک سستا پڑتا ہے اور سرحد کے ساتھ ہونے کی وجہ سے اس کے فریٹ چارجز بھی کم آتے ہیں نیز وقت بھی کم لگتا ہے لہٰذاحکومت صنعتی پیداواری سرگرمیوں کو بلارکاوٹ جاری رکھنے اور برآمدی آرڈرز کی بروقت تکمیل میں اپنا کردار ادا کرتے ہوئے بھارت سے یارن درآمد کرنے کی اجازت دے تاکہ پاکستانی برآمدکنندگان کو بھاری مالی نقصانات سے بچایا جاسکے ۔