پاکستان ٹیلی کمیونیکیشن کمپنی لمیٹڈ اور یوبی ایل کے درمیان معاہدے پر دستخط

جمعرات مارچ 22:35

پاکستان ٹیلی کمیونیکیشن کمپنی لمیٹڈ اور یوبی ایل کے درمیان معاہدے ..
کراچی(اُردو پوائنٹ اخبارتازہ ترین - این این آئی۔ 04 مارچ2021ء) پاکستان ٹیلی کمیونیکیشن کمپنی لمیٹڈ(پی ٹی سی ایل)اور یونائیٹڈ بینک لمیٹڈ(یو بی ایل)نے کراچی میں پی ٹی سی ایل کے درجہ 3 کے حامل سرٹیفائیڈ ڈیٹا سینٹر پر یو بی ایل کی پرائمری سائٹ کی ہوسٹنگ کے لئے ایک معاہدے پر دستخط کیے ہیں۔یوبی ایل ہیڈ آفس کراچی میں منعقدہ تقریب میں ندیم خان، قائم مقام سی ای او اورگروپ چیف فنا نشل آفیسر، پی ٹی سی ایل گروپ اور شہزاد دادا، صدرا ور سی ای او، یوبی ایل کے علاوہ دونوں کمپنیوں کے اعلی حکام نے شرکت کی۔

پی ٹی سی ایل یو بی ایل کوکنٹرول اور بہترین ماحول کے ساتھ جدید ترین ڈیٹا سنٹر فراہم کررہا ہے جو ٹیکنالوجی کے جدید ترین نیٹ ورکس اور آئی ٹی فیبرک فن تعمیر سے لیس ہے۔ اس اشتراک سے پی ٹی سی ایل یوبی ایل کو اس کے انفراسٹرکچر کیلئے سیکورٹی، مضبوطی اور لچک کی بلند ترین سطح فراہم کرے گا۔

(جاری ہے)

اس موقع پر گفتگو کرتے ہوئے ندیم خان، قائم مقام سی ای او اورگروپ چیف فنانشل آفیسر، پی ٹی سی ایل گروپ نے کہاہمیں خوشی ہے کہ یوبی ایل نے اپنی کاروباری اور آئی ٹی سے متعلق ضروریات کو پوراکرنے کیلئے جدید، محفوظ اور قابل بھروسہ سہولت کے حصول کیلئے پی ٹی سی ایل کوایک قابل اعتماد شراکت دار کے طور پر منتخب کیا ہے۔

پی ٹی سی ایل اپنے کارپوریٹ صارفین کوجدید ترین سلوشز فراہم کرنے کیلئے کوشاں ہے تاکہ وہ اپنے صارفین پر اعتماد قائم کرسکیں۔ قومی کمپنی ہونے کے ناطے ہمارا مقصد صارفین کوان کے مقاصد کے حصول کیلئے بااختیار بنانا اور ان کے کاروبار کی ترقی کیلئے انہیں مزید معاونت فراہم کرنا ہے۔اس اشتراک پر اظہار خیال کرتے ہوئے، شہزاد دادا، صدر و سی ای او، یوبی ایل نے کہا پاکستان کا بہترین ڈیجیٹل بینک ہونے کی حیثیت سے یو بی ایل جدید ترین ٹیکنالوجیز کے استعمال میں ہمیشہ سرکردہ بینک رہا ہے۔

ہم صارفین کو محفوظ اور قابل بھروسہ ماحول میں بہترین سلوشنز کی فراہمی کا سلسلہ جاری رکھیں گے۔ یہ شراکت داری ہماری تذویراتی ترجیحات پر عمل درآمدکرانے میں سودمند ثابت ہوگی جس میں آپریشنل کارکردگی اور صارفین کیلئے بہترین سروس شامل ہے۔پی ٹی سی ایل کاروباری صارفین کو جدید اورمضبوط ترین آئی ٹی سلوشنز اور سروسزکی فراہمی جاری رکھے گا تاکہ وہ موثر انداز میں اپنی کاروباری سرگرمیاں جاری رکھ سکیں اور ان کا ڈیٹا محفوظ رہے۔