کراچی، طاقت کے نشے میں چور با اثر افراد کی وائرل ویڈیو سے نشان دہی، پولیس نے دھر لیا

جمعہ 5 مارچ 2021 23:05

کراچی(اُردو پوائنٹ اخبارتازہ ترین - این این آئی۔ 05 مارچ2021ء) شہر قائد کے علاقے ڈیفنس میں وڈیرہ گردی کا ایک اور واقعہ پیش آیا ہے، طاقت کے نشے میں چور با اثر افراد کی ویڈیو سوشل میڈیا پر وائرل ہو گئی۔میڈیا پر خبرنشرہونے کے بعدایکشن لیتے ہوئے پولیس نے بگڑا رئیس زادہ گرفتار کر لیا، با اثر مسلح امیر زادے نے ہوٹل مالک کو دھمکیاں دی تھیں، اور کافی شاپ پر خاتون کو بھی ہراساں کیا تھا۔

ویڈیو میں با اثر شخص کو اسلحہ بردار افراد کے ہمراہ بدمعاشی کرتے دیکھا جا سکتا ہے، پولیس کا کہنا ہے کہ مسلح افراد نے ہوٹل کے انتظامیہ اور اسٹاف کو تشدد کا نشانہ بنایا، عینی شاہدین کے مطابق گاڑیوں پر نمبر بھی موجود نہیں تھا، ایک گاڑی میں با اثر افراد اور دوسری میں سیکیورٹی گارڈز تھے۔

(جاری ہے)

واقعے کی ویڈیو منظر عام پر آنے کے بعد پولیس نے ویڈیو میں نظر آنے والے نوجوان عمیر حسنی اور دو سیکیورٹی گارڈز کو اسلحہ سمیت گرفتار کر لیا، پولیس حکام کا کہنا ہے کہ سوشل میڈیا پر وائرل فوٹیج میں نظر آنے والا نوجوان عمیر حسنی ہے، ویڈیو میں با اثر نوجوان کو محافظوں کے ہمراہ کافی شاپ پر آتے دیکھاگیا۔

دوسری طرف گرفتاری کے بعد عمیر حسنی نے پولیس کے سامنے اپنے بیان میں کہا ہے کہ مسلسل ہارن دینے پر پیچھے سے آنے والی گاڑی کے ڈرائیور سے تلخ کلامی ہوئی تھی، کافی شاپ کے گارڈ نے بھی مجھ سے الجھنے کی کوشش کی۔پولیس حکام کا کہنا ہے کہ زیر حراست نوجوان بلوچستان کی ایک سیاسی شخصیت کا بیٹا ہے، عمیر کے گارڈز کے اسلحے کی جانچ پڑتال اور واقعے سے متعلق تفتیش جاری ہے۔