مسجد اقصی میں رمضان المبارک کی 27 ویں شب نمازیوں پراسرائیلی فوج کا حملہ قابل مذمت ہے ، شاہ محمود

فلسطینیوں پر ظلم اور بربریت اور زبردستی بے دخل کرنے کا کوئی اخلاقی، سیاسی جواز نہیں، میڈیا سے گفتگو

اتوار مئی 18:50

اسلام آباد (اُردو پوائنٹ اخبارتازہ ترین - این این آئی۔ 09 مئی2021ء) وزیر خارجہ شاہ محمود قریشی نے مسجد اقصی میں رمضان المبارک کی 27 ویں شب عبادت کے دوران اسرائیلی فوج کے حملے کی پر زور مذمت کرتے ہوئے کہا ہے کہ نماز یوں کو تشدد کا نشانہ بنانا اور فلسطینیوں کو ان کے گھروں ، جائیدادوں سے ظلم و بربریت کے ذریعے بے دخل کرنے کا کوئی اخلاقی، سیاسی جواز نہیں ، پاکستان فلسطینیوں کے ساتھ اور ان کے حقوق کا علمبردار ہے ، عرب لیگ، او آئی سی اور امت مسلمہ کو یکجا ہوکر آواز اٹھانا ہو گی،عرب لیگ کا ہنگامی اجلاس بلانا بر وقت فیصلہ اور مناسب قدم ہے انسانی حقوق کے علمبردار مغربی ممالک اورہیومن رائٹس کونسل بھی فی الفور اس صورتحال کا نوٹس لیں۔

اتوار کو نجی ٹی وی چینلز سے گفتگو کرتے ہوئے وزیر خارجہ شاہ محمود قریشی نے اس عزم کا اعادہ کیا کہ پاکستان نے مسجد اقصی میں عبادت کے دوران اسرائیلی فوج کے حملے کی پر زور مذمت کی ہے ، اس کا کوئی جواز نہیں بنتا۔

(جاری ہے)

انہوں نے کہا کہ رمضان المبارک کی 27 ویں شب کو جب لوگ نماز اور نوافل ادا کر رہے تھے انہیں تشدد کا نشانہ بنایا گیا، فلسطینیوں کو ان کے گھروں سے ان کی جائیدادوں سے اس طرح ظلم اور بربریت کے ذریعے بے دخل کرنے کا کوئی اخلاقی، کوئی سیاسی جواز نہیں ہے۔

انہوں نے کہا کہ پاکستان فلسطینیوں کے ساتھ ہے ،فلسطینیوں کے حقوق کا علمبردار ہے اور پاکستان نے ہمیشہ ٹھوس موقف اپنایا ہے اور آج بھی اپنا رہے ہیں۔شاہ محمود قریشی نے کہا کہ یہ امر اطمینان بخش ہے کہ عرب لیگ نے ایک ہنگامی اجلاس بلایا ہے،یہ بر وقت فیصلہ اور مناسب قدم ہے، میں سمجھتا ہوں کہ یکجا ہو کر عرب لیگ ، او آئی سی اور مسلم امہ کو اس پر بات کرنی چاہیے۔

انہوں نے کہا کہ مغربی ممالک جو انسانی حقوق کے علمبردارکہلاتے ہیں ان کی توجہ اس طرف مبذول کرانی چاہئے کہ یہ طریقہ درست نہیں ہے۔ انہوں نے کہا کہ مغربی ممالک کی توجہ مبذول کرانے کے لئے سب سے اہم چیز اتفاق و یکجہتی ہے، انہوں نے کہا کہ کچھ قوتیں ہیں جو مسلمانوں کے اتفاق کو پارہ پارہ کرنے کی کوشش کرتی ہیں، غلط فہمیوں کو ہوا دیتی ہیں ، جھوٹا پراپیگنڈہ اجاگر کرتی ہیں ، مسلمان ممالک کے اندر نفرت کے بیج بوتی ہیں ان کو شکست دینا ہوگی اور ان کے عزائم کو خاک میں ملانا ہوگا۔

شاہ محمود قریشی نے کہا کہ یکجہتی کا مظاہرہ کرنا ہوگا، او آئی سی کے پلیٹ فارم سے،اقوام متحدہ ، ہیومن رائٹس کونسل کے پلیٹ فارم سے یکسوئی سے اپنے موقف ، اپنی موثر آواز کو اجاگر کرنا ضروری ہے۔ وزیر خارجہ نے کہا کہ جس طرح فلسطینیوں کو بے دخل کرنے کی کوشش کی جا رہی ہے اس کی پاکستان نے بڑے ٹھوس انداز میں مذمت کی ہے۔انہوں نے کہا کہ ہم فلسطینیوں کے حقوق کے ساتھ کھڑے ہیں، انہوں نے کہا کہ میں ایک مرتبہ پھر پاکستان کے موقف کا اعادہ کرنا چاہوں گا کہ فلسطینیوں کو ان کے حقوق ملنے چاہئیں، یہ ظلم فی الفور بند ہونا چاہیے۔ انہوں نے کہا کہ انسانی حقوق کے علمبرداروں کو اس صورت حال کا نوٹس لینا چاہئے۔