صدرمملکت سے کریسنٹ گیلری کے سی ای او کی ملاقات

آرٹ، کلچر اور تاریخی مقامات ملک کا قیمتی اثاثہ ہیں، ملک میں آرٹ آکشن ہائوس کے قیام کیلئے اقدامات کریں گے،ڈاکٹر عارف علوی

جمعرات 10 جون 2021 23:07

صدرمملکت سے کریسنٹ گیلری کے سی ای او کی ملاقات

کراچی (اُردو پوائنٹ اخبارتازہ ترین - آن لائن۔ 10 جون2021ء) صدر مملکت ڈاکٹر عارف علوی سے کریسنٹ آرٹ گیلری کے چیف ایگزیکٹو ناصر جاوید نے وفد کے ہمراہ ایوان صدر میں ملاقات کی اور آرٹ، کلچر ٹورازم سمیت مختلف امور پر تبادلہ خیال کیا۔ اس موقع پر رحمت سمیرناصر اور سدرہ ناصر بھی موجود تھیں۔ صدر مملکت ڈاکٹر عارف علوی نے گفتگو کرتے ہوئے کہا کہ آرٹ، کلچر اور تاریخی مقامات ملک کا قیمتی اثاثہ ہیں۔

بدقسمتی سے آرٹ کے فروغ کیلئے انقلابی اقدامات نہیں کیے گئے۔ انہوں نے مزید کہا کہ ملک میں آرٹ آکشن ہائوس کے قیام کیلئے اقدامات کریں گے۔ سوئیڈن میں پہلا آکشن ہائوس بنا اس کے بعد دیگر ممالک میں آکشن ہائوس کو ترغیب دی گئی۔ ڈاکٹر عارف علوی نے کہا کہ یورپ اور دنیا بھر میں آرٹ کی بے انتہا قدر ہے۔

(جاری ہے)

پاکستان کا آرٹ اور کلچر بھی کئی ممالک میں خاص اہمیت کا حامل ہے جسے بے حد پسند کیا جاتا ہے۔

انہوں نے مزید کہا کہ آرٹ کلچر اور ٹورازم کو ترقی دینے کیلئے تمام تر وسائل استعمال کریں گے جس کیلئے جامع منصوبہ بندی کی گئی ہے اور بیرون ممالک میں پاکستانی سفارتخاروں کو ٹاسک دیا گیا ہے۔ کریسنٹ آرٹ گیلری کے سی ای او ناصر جاوید نے گفتگو کرتے ہوئے کہا کہ آرٹ آکشن ہائوس کے قیام سے پاکستان میں آرٹ کا گراف اوپر جائے گا اور آرٹ کی تعلیم حاصل کرنے والے طلباء اور آرٹسٹوں کو اپنی پینٹنگ کی نمائش اور آکشن کی سہولت ہوگی۔ بعدازاں ناصر جاوید نے صدر مملکت کو پوٹریٹ بھی پیش کیا۔ انہوں نے کریسنٹ کی آرٹ کے فروغ میں خدمات کو بھی سراہا ہے۔