سعودیہ میں ایک انتہائی قابل اعتراض تقریب کی ویڈیو وائرل ہونے پر عوام بھڑک اُٹھے

ویڈیو میں رقاصاؤں نے بے ہودہ ڈانس کیا تھا، حکام نے سوشل میڈیا اسٹارز پر لاکھوں ریال جرمانہ عائد کر دیا

محمد عرفان پیر 14 جون 2021 14:00

سعودیہ میں ایک انتہائی قابل اعتراض تقریب کی ویڈیو وائرل ہونے پر عوام ..

ریاض(اُردو پوائنٹ تازہ ترین اخبار۔14 جون2021ء) سعودی عرب میں گزشتہ چند سالوں کے دوران تفریحی سرگرمیوں کی اجازت دے دی گئی جس کے میوزک کانسرٹس اور اسٹیج ڈرامے بھی منعقد ہو رہے ہیں تاہم ان تفریحی تقریبات میں کسی طرح کے بے ہودہ ناچ اور اخلاق سے گری حرکات کی اجازت نہیں ہے۔ سعودیہ میں گزشتہ ماہ ایک کمپنی نے تشہیری مہم کے لیے سوشل میڈیا اسٹارز کو اکٹھا کر کے ایک تقریب منعقد کی تھی، جس میں کچھ شرمناک مناظر کی ویڈیوز سوشل میڈیا پر وائرل ہو گئی تھی۔

ان اخلاق باختہ حرکات پر سعودی عوام کا سخت ردعمل آیا تھا۔ جس کے بعدسعودی جنرل کمیشن فار آڈیو ویژوئل میڈیا نے سوشل میڈیا کی ان متعدد مشہور شخصیات سے تحقیقات کی ہیں جنہوں نے گذشتہ ماہ ریاض میں ہونے والی ایک تقریب میں شرکت کی تھی۔

(جاری ہے)

العربیہ نیوز کے مطابق تقریب سے پکڑے جانے والے 12 افراد پر 50 ہزار سے 3 لاکھ ریال تک جرمانہ کیا گیا جب کہ منتظم کمپنی پر 4 لاکھ ریال جرمانہ عائد کیا گیا ہے۔

تقریب میں شریک 12 افراد میں 5 غیر ملکی مقیمین ہیں۔اس سے قبل سعودی وزارت تجارت نے "اسنیپ چیٹ" کی معروف شخصیات کو ایک تقریب میں اکٹھا کرنے کے ذمے دار کمپنی کی طلبی کی تھی۔ کمپنی کی جانب سے ریاض میں ہونے والی اس تقریب میں کرونا وائرس کی روک تھام کے لیے نافذ احتیاطی اقدامات اور حفاظتی تدابیر کی خلاف ورزیوں کا ارتکاب کیا گیا تھا۔ وزارت تجارت کے اعلان کے مطابق ذمے دار کمپنی پر 3 لاکھ ریال جرمانہ عائد کیا گیا ہے۔

کمپنی نے سوشل میڈیا پر اپنی مصنوعات کی تشہیر کے لیے مذکورہ مشہور شخصیات کی مدد لی تھی۔ کمپنی کو وزارت داخلہ کی جانب سے مقرر کردہ کووڈ-19 کے حفاظتی پروٹوکول کی خلاف ورزیوں کے سبب بھاری جرمانے کا سامنا کرنا پڑا۔واضح رہے کہ سعودی عرب میں ہونے والی ایک تقریب کے نامناسب وڈیو کلپس گذشتہ ماہ مئی کے اواخر میں سوشل میڈیا پر گردش میں آئے تھے۔

تقریب میں سوشل میڈیا کی متعدد معروف شخصیات نے شرکت کی۔ انہوں نے یہ وڈیو کلپ اپنے اکاوٴنٹس پر جاری بھی کیے تھے۔سوشل میڈیا پر گردش میں آئے کلپوں میں ایک تقریب میں متعدد رقاصاوٴں کی موجودگی بھی سامنے آئی۔ اس کے نتیجے میں سوشل میڈیا کے حلقوں میں شدید غصے کی لہر دوڑ گئی۔ علاوہ ازیں تقریب میں سعودی وزارت داخلہ کی جانب سے اجازت دی گئی تعداد سے زیادہ افراد شریک ہوئے۔ اس دوران میں حفاظتی تدابیر اور احتیاطی اقدامات کہیں نظر نہیں آئے۔