Live Updates

پاکستان اور افغانستان کے درمیان پہلی باقاعدہ کرکٹ سیریز کیلئے افغان ٹیم کا اعلان

سیریز کا وینیو بھی تبدیل کر دیا گیا، متحدہ عرب امارات میں آئی پی ایل کے انعقاد کے باعث سیریز سری لنکا میں ہونے کا امکان

محمد علی ہفتہ 24 جولائی 2021 00:19

کابل (اُردو پوائنٹ اخبارتازہ ترین۔ 23 جولائی2021ء) پاکستان اور افغانستان کے درمیان پہلی باقاعدہ کرکٹ سیریز کیلئے افغان ٹیم کا اعلان، سیریز کا وینیو بھی تبدیل کر دیا گیا، متحدہ عرب امارات میں آئی پی ایل کے انعقاد کے باعث سیریز سری لنکا میں ہونے کا امکان۔ تفصیلات کے مطابق افغانستان کرکٹ بورڈ نے پاکستان کے خلاف سیریز کے لیے ٹیم کا اعلان کر دیا ہے۔

Afghanistan's #Squad for the three-match ICC ODI Super League matches against @TheRealPCB in September #AFGvPAK pic.twitter.com/03elqNltGZ
— Afghanistan Cricket Board (@ACBofficials) July 23, 2021

افغان ٹیم کی قیادت حشمت اللہ شاہدی کریں گے۔ 17 رکنی ٹیم میں رحمان اللہ گرباز، ابراہیم زدران، صدیق اٹل، رحمت شاہ اور نجیب زدران شامل ہیں۔ ان کے علاوہ دیگر کھلاڑیوں میں اکرام علی خیل، شاہد کمال، محمد نبی، کریم جنت، عظمت عمر زئی، راشد خان اور عبدالرحمان بھی ٹیم کا حصہ ہیں جبکہ نوین الحق، مجیب الرحمن، فضل الحق فاروقی اور نور احمد کو بھی ٹیم میں شامل کیا گیا ہے۔

(جاری ہے)

سیریز کے لیے 4 ریزرو کھلاڑیوں کے ناموں کا بھی اعلان کیا گیا ہے۔ مزید بتایا گیا ہے کہ پاکستان اور افغانستان کے درمیان 3 ایک روزہ میچز پر مشتمل سیریز کا انعقاد شارجہ میں ہونا ہے، تاہم آئی پی ایل کے متحدہ عرب امارات میں انعقاد کی وجہ سے افغان کرکٹ بورڈ نے سیریز کا وینیو تبدیل کرنے کا فیصلہ کیا ہے۔ افغان کرکٹ بورڈ کی جانب سے سری لنکا میں سیریز کے انعقاد کی کوششیں جاری ہیں، اس حوالے سے لنکن کرکٹ بورڈ سے باقاعدہ رابطہ بھی کیا گیا ہے۔ یہاں واضح رہے کہ یہ پاکستان اور افغانستان کے درمیان آج تک کھیلی جانے والی پہلی باقاعدہ کرکٹ سیریز ہو گی۔