ْجیمز بانڈ کی فلم ’نو ٹائم ٹو ڈائی‘ 2021 میں 500 ملین ڈالر کمانے والی دوسری ہالی ووڈ فلم بن جائے گی

جمعرات 21 اکتوبر 2021 12:20

لاس اینجلس (اُردو پوائنٹ اخبارتازہ ترین - این این آئی۔ 21 اکتوبر2021ء) معروف برطانوی اداکار ڈینیل کریگ کی بطور007 جیمز بانڈ آخری فلم ’نو ٹائم ٹو ڈائی‘ 2021 میں 500 ملین ڈالر کمانے والی دوسری ہالی ووڈ فلم بن جائے گی۔

(جاری ہے)

غیر ملکی میڈیا رپورٹس کے مطابق جیمز بانڈ کی 25 ویں ایڈونچ رفلم ’نو ٹائم ٹو ڈائی‘ کی آمدنی بدھ کے روز تک مجموعی طور پر 368 ملین ڈالر سے تجاوز کر گئی ہے ،فلم کی دنیا بھر میں مجموعی آمدنی 474 ملین ڈالر ہے،یہ فلم اس ہفتے کے آخر میں فلم ’فاسٹ اینڈ فیورئس 9‘ کے بعد 500 ملین ڈالر کا سنگ میل عبور کرنے والی سال 2021 کی دوسری ہالی ووڈ فلم ہوگی۔

ڈینیل کریگ کی فلم نے ابھی وارنر بروسکی فلم ’ گوڈزیلا vs کانگ ‘ کو پیچھے چھوڑ کر دنیا بھر میں باکس آفس پر پانچویں پوزیشن حاصل کرلی ہے۔چینی ہٹ فلم ’ چائنا ٹائون 3‘ اس وقت دنیا بھر میں چوتھے نمبر پر ہے جس کی آمدنی686.8 ملین ڈالر ہیں اور ’ فاسٹ اینڈ فیورئس 9‘ فی الحال دنیا بھر میں تیسرے نمبر پر ہے جس کی آمدنی 543.5 ملین ڈالر ہے۔دنیا بھر میں سرفہرست دو فلمیں چین کی ہیں ، ’دی بیٹل ایٹ لیک چھیئناگ‘ جو769 ملین ڈالر کے ساتھ دوسرے نمبر پر اور’ ہائی موم ‘ 822 ملین ڈالر کے ساتھ پہلے نمبر پر ہے۔