آئی سی سی بھی علیم ڈار کے دلکش سٹروک کا فین

آئی سی سی نے سری لنکا اور ویسٹ انڈیز کے میچ سے قبل پاکستانی امپائر کا کرکٹ شاٹ کھیلتے ہوئے ایک ویڈیو کلپ شیئر کیا

ذیشان مہتاب جمعہ 5 نومبر 2021 12:40

آئی سی سی بھی علیم ڈار کے دلکش سٹروک کا فین

دبئی (اردو پوائنٹ تازہ ترین اخبار ۔ 5 نومبر 2021ء ) دنیا میں سب سے زیادہ بین الاقوامی میچز میں امپائرنگ کا اعزاز حاصل کرنے والے علیم ڈار کے دلکش سٹروک کا آئی سی سی فین ہوگیا۔ انٹرنیشنل کرکٹ کونسل (آئی سی سی) نے جمعرات کو ابوظہبی کرکٹ سٹیڈیم میں سری لنکا اور ویسٹ انڈیز کے میچ سے قبل پاکستانی امپائر علیم ڈار کا کرکٹ شاٹ کھیلتے ہوئے ایک ویڈیو کلپ شیئر کیا۔

ویڈیو کلپ میں دیکھا جاسکتا ہے کہ علیم ڈار نے پچ پر کھڑے ہوکر ایک دلکش سٹروک کھیلا۔

(جاری ہے)

آئی سی سی نے بھی بہترین سٹروک کھیلنے پر امپائر کی مہارت کی تعریف کی۔ واضح رہے کہ علیم ڈار نے سب سے زیادہ ون ڈے اور ٹیسٹ میچوں میں امپائرنگ کرکے کئی ریکارڈ قائم کیے ہیں۔ 6 جون 1968ء کو جھنگ میں پیدا ہونے والے علیم ڈار آئی سی سی امپائرز کے ایلیٹ پینل کے رکن ہیں۔ وہ امپائر بننے سے پہلے فرسٹ کلاس کرکٹ بھی کھیل چکے تھے۔ 53 سالہ علیم ڈار نے 2005ء اور 2006ء میں دو بار نامزد ہونے کے بعد 2009ء سے 2011ء تک لگاتار تین سال کے لیے ڈیوڈ شیفرڈ ٹرافی بھی سال کے بہترین امپائر کے طور پر جیتی ہے۔