ایشیا کپ میں پاکستان کیخلاف میچ، بی سی سی آئی کا وضاحتی بیان سامنے آگیا

یہ پالیسی صرف کرکٹ تک محدود نہیں بلکہ دوسرے کھیلوں پر بھی لاگو ہوتی ہے : سیکریٹری بی سی سی آئی دیوجیت سائیکیا

ذیشان مہتاب اتوار 7 ستمبر 2025 16:30

ایشیا کپ میں پاکستان کیخلاف میچ، بی سی سی آئی کا وضاحتی بیان سامنے آگیا

نئی دہلی (اردو پوائنٹ تازہ ترین اخبار ۔ 5 ستمبر 2025ء ) بھارتی کرکٹ ٹیم کی ایشیاء کپ میں پاکستان کے ساتھ کھیلنے پر بھارتی کرکٹ بورڈ (بی سی سی آئی) کی وضاحت سامنے آگئی۔

بھارتی کرکٹ بورڈ کے سیکرٹری دیوجیت سائیکیا نے پاکستان کے ساتھ کھیلنے کی پالیسی کے حوالے سے کہا ہے کہ ہم مرکزی حکومت کو فالو کرتے ہیں، بھارت کی حالیہ پالیسی کے مطابق انٹرنیشنل ٹورنامنٹس میں بھارتی ٹیم کی شرکت پر پابندی نہیں۔

سیکرٹری بی سی سی آئی دیوجیت سائیکیا کا کہنا تھا کہ جہاں تک بی سی سی آئی کے مؤقف کا تعلق ہے، ہمیں وہی فالو کرنا پڑتا ہے جو مرکزی حکومت طے کرتی ہے، بھارت کی حالیہ نئی پالیسی کسی بھی کثیرالملکی یا بین الاقوامی ٹورنامنٹ میں شرکت سے متعلق نہیں روکتی۔

دیوجیت سائیکیا کا کہنا تھا کہ نئی پالیسی واضح طور پر کہتی ہے کہ مرکزی حکومت کی طرف سے ایسے ممالک کے خلاف کھیلنے پر کوئی پابندی عائد نہیں کی گئی ہے جو بھارت کے ساتھ دوستانہ تعلقات نہیں رکھتے، اس لیے بھارت کو کسی بھی کثیرالملکی ٹورنامنٹ میں تمام میچز کھیلنے ہوں گے، ایشیا کپ ملٹی نیشنز ٹورنامنٹ ہے اسی لیے ہم شرکت کریں گے۔

(جاری ہے)

سیکرٹری بی سی سی آئی کے مطابق اسی طرح آئی سی سی ٹورنامنٹس جس میں ایسے ممالک جن کے ساتھ بھارت کے اچھے تعلقات نہیں ہیں وہ ہمیں کھیلنا ہوگا، جہاں تک دوطرفہ تعلقات کی بات ہے وہاں ہم کسی دشمن ملک کے خلاف نہیں کھیلیں گے۔

ان کا کہنا تھا کہ ہم بھارتی حکومت اور سپورٹس ڈیپارٹمنٹ کی بنائی ہوئی پالیسی پر عمل کر رہے ہیں، اس پالیسی میں نہ صرف کرکٹ بلکہ باقی کھیل بھی شامل ہیں، اگر بھارت کسی بھی کھیلوں کے ملٹی نیشنل ٹورنامنٹ میں کسی مخصوص ملک کے خلاف کھیلنے سے انکار کرتا ہے تو اس پر پابندیاں لگ سکتی ہیں۔

ان کا مزید کہنا تھا کہ مثال کے طور پر اگر ایتھلیٹکس فیڈریشن پر پابندی لگتی ہے تو نیرج چوپڑا کسی انٹرنیشنل ایونٹ میں شرکت نہیں کرسکےگا اور یہ کھلاڑی کے لیے نقصان دہ ہوگا، بھارتی حکومت نے سوچ سمجھ کر یہ پالیسی بنائی ہے۔