انڈونیشیا میں آتش فشاں پھٹنے سے 14افراد ہلاک، درجنوں زخمی

جکارتہ (اُردو پوائنٹ اخبارتازہ ترین - این این آئی۔ 06 دسمبر2021ء) انڈونیشیا میں سیمیرو آتش فشاں کے پھٹنے سے جاوا جزیرے پر کم از کم 14 افراد ہلاک جبکہ درجنوں زخمی ہوگئے۔غیرملکی خبررساںادارے کے مطابق انڈونیشیا کی ڈیزاسٹر ایجنسی کا کہنا تھا کہ کئی بار امدادی ٹیموں کو راکھ تلے دبے متاثرین کو تلاش کرنے کے لیے اپنے ہاتھوں سے کھدائی کرنی پڑتی ہے۔

جاوا کے سب سے اونچے پہاڑ سیمیرو میں آتش فشاں پھٹ گیا جس کی وجہ سے گرم دھویں اور راکھ نے مشرقی جاوا صوبے کے قریبی دیہاتوں کو لپیٹ میں لیے لیا، لوگ خوف و ہراس کے باعث علاقہ چھوڑنے پر مجبور ہوگئے۔حکام کا کہنا تھاکہ آتش فشاں پھٹنے سے عمارتیں تباہ ہو گئیں اور قریبی ضلع لوماجنگ کے 2 علاقوں کو ملنگ شہر سے ملانے والا ایک اسٹریٹجک پل ٹوٹ گیا۔

(جاری ہے)

بی این پی بی کے عہدیدار نے پریس کانفرنس میں بتایا گیا کہ 14 افراد ہلاک ہوئے ہیں، جن میں سے 9 کی شناخت کی جاچکی ہے جبکہ 56 افراد زخمی ہیں، جن میں سے اکثر جھلس گئے ہیں۔بی این پی بی نے کہا کہ کم و بیش ایک ہزار 300 افراد کو نکال لیا گیا ہے، جبکہ 9 اب بھی لاپتا ہیں۔لوماجنگ ضلع کے رہائشی توفیق اسمعیل مرزوقی، جنہوں نے رضاکارانہ طور پر متاثرین کی مدد کی تھی، نے کہا کہ ٹوٹے ہوئے پل اور رضاکاروں کے پاس تجربے کی کمی کی وجہ سے ریسکیو کی کوششوں میں بہت مشکل پیش آئی۔

انہوں نے ایک ویڈیو بھی ریکارڈ کی جس میں دیکھا گیا کہ پولیس اور فوجی اہلکار ہاتھوں سے لاشیں نکالنے کی کوشش کر رہے ہیں۔سرکاری خبر رساں ایجنسی کی رپورٹ کے مطابق لوماجنگ کے گائوں کوراہ کوبوکان میں امدادی کارکنوں کو ایک ماں کی لاش ملی جو اپنے مردہ بچے کو اب بھی اٹھائے ہوئے تھی۔ایک عینی شاہد نے بتایا کہ سمبرولوہ کے علاقے میں گھر اور گاڑیاں مکمل طور پر راکھ تلے دب گئی ہیں جبکہ گرے ہوئے درختوں کی وجہ سے سڑکیں بند ہوگئی ہیں، ایک گائے جسے گاں والے بچانے میں ناکام رہے تھے سڑک کے کنارے پڑی تھی۔

اپنے خاندان سمیت نکلنے والی 31 سالہ مقامی حسنیہ نے بتایا کہ واقعہ بہت اچانک ہوا تھا، پہلے میں نے سوچا کہ یہ ایک بم دھماکا ہے پھر اچانک اندھیرا چھا گیا، جیسے یہ زمین کو تباہ کرنے والا ہو۔موسمیاتی ادارے کے عہدیدران کا کہنا تھا کہ آئندہ 3 روز تک موسلادھار بارش متوقع ہے، جس کی وجہ سے شہریوں کو نکالنے کی کوششوں میں مشکلات پیش آسکتی ہیں۔

امدادی عملے کے اہلکار کا کہنا تھا کہ چٹان کے ملبے اور گرم آتش فشاں کی وجہ سے پہلے ہی نقل و حرکت محدود ہے۔بی این پی بی کے سربراہ کا کہنا تھا کہ وہ تباہ شدہ گھروں کو دوبارہ تعمیر کریں گے جبکہ یہاں کھدائی کرنے والے اور بلڈوزر سمیت ریسکیو کے بھاری آلات بھی لائے جارہے ہیں۔ایجنسی نے یہ بھی بتایا کہ آتش فشاں پھٹنے سے ریت کی کان میں پھنسے 10 افراد کو نکال کر محفوظ مقام پر منتقل کردیا گیا ہے۔

ماہرین کے مطابق سیمیرو آتش فشاں 2014 سے پھٹنے کے مرحلے میں ہے، یہاں گرم بادلوں اور لاوے کے بہائو کا اخراج شروع ہوگیا ہے، جس کے بعد حکام نے لوگوں کو وارننگ جاری کی ہے کہ اس سے دور رہیں۔انڈونیشیا کی وزارت نقل و حمل نے کہاکہ آتش فشاں پھٹنے سے پروازوں میں کوئی خلل نہیں پڑا، حالانکہ پائلٹوں کو الرٹ جاری کر دیا گیا ہے کہ وہ راکھ کے گرنے سے بچیں۔