غیر ملکی ایئرلائن فلائی دبئی نے اسکردو آپریشنز شروع کرنے کیلئے درخواست دیدی

منگل 7 دسمبر 2021 00:01

اسلام آباد (اُردو پوائنٹ اخبارتازہ ترین - این این آئی۔ 06 دسمبر2021ء) سول ایوی ایشن کی سیاحتی مقامات کے لیے کاوشیں رنگ لانے لگیں، غیر ملکی ایئرلائن فلائی دبئی نے اسکردو آپریشنز شروع کرنے کیلئے درخواست دے دی،فلائی دبئی سول ایوی ایشن سے منظوری کے بعد اسکردو آپریشنز شروع کر سکے گی۔اس سے قبل سیاحت کے فروغ کے تحت پی آئی اے نے بڑا فیصلہ کرتے ہوئے ایک اور شہر سے اسکردو کیلئے براہ راست پروازوں کا آغاز کیا تھا۔

پی آئی اے نے کراچی، لاہور اور اسلام آباد کے بعد فیصل آباد سے اسکردو کیلئے پروازیں شروع کر رکھی ہیں۔علاوہ ازیں وزیراعظم عمران خان کی ملکی سیاحت کو فروغ دینے کے منصوبے کے تحت سول ایوی ایشن نے 4 نئی ائیرلائنز کولائسنس جاری کردیئے۔کشمیرائیر،الویر ائیرویز ،اے ایس ایس ایل ائیر، نارتھ ائیر کو لائسنس جاری کئے گئے ، چاروں نجی کمپنیوں نے جلد اندرون ملک سیاحتی پروازوں کے آغاز کا اعلان کردیا ہے۔

(جاری ہے)

پہلے مرحلے میں لاہور ، کراچی اور اسلام آباد سے پروازیں آپریٹ کرنے پر غور کیا جائیگا جبکہ گوادر، تربت، موہنجوداڑو، گلگت، اسکردو، ہنزہ اور گندھارا کے لیے پروازیں چلائی جائیں گی۔ائیرلائنز کی جانب سے سیاحتی مقامات کے لیے ہیلی کاپٹر ، فکسڈ ونگ اور روٹری ونگ طیارے استعمال کیے جائیں گے۔