شاہین آفریدی نے محمد رضوان کو بابراعظم سے بہتر کپتان قرار دیدیا

لاہور (اردو پوائنٹ تازہ ترین اخبار ۔ 21 دسمبر 2021ء ) لاہور قلندرز کے نئے کپتان شاہین آفریدی نے انکشاف کیا ہے کہ وہ محمد رضوان کو بابراعظم سے بہتر کپتان قرار دیتے ہیں۔ ایک پریس کانفرنس میں ایک جانب شاہین آفریدی کو لاہور قلندرز کی ٹیم کا نیا کپتان بنانے کا باضابطہ اعلان کیا گیا وہیں دوسری طرف بائیں ہاتھ کے پیسر سے بابراعظم کی کپتانی کے حوالے سے ان کی رائے پوچھی گئی۔

شاہین آفریدی کا کہنا تھا کہ بابراعظم میرے پسندیدہ بلے باز ہیں اور وہ نمبر ون بلے باز بھی ہیں، انہوں نے قومی ٹیم کے کپتان کے طور پر شاندار کارکردگی کا مظاہرہ کیا ہے اور ہم ان کی قیادت میں نئی ​​بلندیوں کو چھو رہے ہیں۔ ایک اور سوال میں شاہین آفریدی سے پوچھا گیا کہ جب سے انہوں نے کھیلنا شروع کیا ہے تب سے ان کے نزدیک بہترین کپتان کون ہے۔

(جاری ہے)

اس سوال کے جواب میں شاہین آفریدی نے کہا کہ مجھے محمد رضوان کی شخصیت پسند ہے ، میں نے کے پی کے کی طرف سے ان کے ساتھ ڈومیسٹک مقابلے کھیلنا شروع کیے اور میں اسے بہترین قرار دوں گا۔ لاہور قلندرز کی ٹیم کے نئے کپتان نے کہا کہ چونکہ بابراعظم نے قومی ٹیم کے ساتھ بطور کپتان شاندار کارکردگی کا مظاہرہ کیا ہے اس لیے میں انہیں دوسرے نمبر پر رکھوں گا۔