سرجیکل آلات کی صنعت اہم برآمدی شعبہ ہے،حکومت سرپرستی کرے،میاں زاہد حسین

یہ شعبہ زرمبادلہ کمانے کے ساتھ لاکھوں ملازمتیں فراہم کررہا ہے،ڈیوٹی ڈرا بیک میں کمی نے سرجیکل انڈسٹری کو خوفزدہ کردیا ہے،صدر کراچی انڈسٹریل الائنس

جمعہ 28 جنوری 2022 17:21

سرجیکل آلات کی صنعت اہم برآمدی شعبہ ہے،حکومت سرپرستی کرے،میاں زاہد ..

کراچی (اُردو پوائنٹ اخبارتازہ ترین - این این آئی۔ 28 جنوری2022ء) نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولز فورم وآل کراچی انڈسٹریل الائنس کے صدراورسابق صوبائی وزیرمیاں زاہد حسین نے کہا ہے کہ سرجیکل آلات کی صنعت اہم برآمدی شعبہ ہے جس کے گرد گھیرا تنگ کرنے کے بجائے اسکی سرپرستی کی جائے۔ یہ شعبہ زرمبادلہ کمانے کے ساتھ لاکھوں افراد کوملازمتیں بھی فراہم کررہا ہے۔

حال ہی میں ایف بی آر کی جانب سے ڈیوٹی ڈرا بیک میں کمی نے سرجیکل انڈسٹری کوخوفزدہ کردیا ہے جبکہ آرڈرز کی تکمیل مشکل ہو گئی ہے۔ میاں زاہد حسین نے کاروباری برادری سے بات چیت کرتے ہوئے کہا کہ جراحی کے آلات بنانے والا شعبہ 140 ممالک کوبرآمدات کر کی435 ملین ڈالر زرمبادلہ کما رہا ہے۔

(جاری ہے)

یہ ایک لاکھ 50 ہزارکارکنوں کو براہ راست ملازمت اورتقریباً چارلاکھ کارکنوں کے لیے بالواسطہ روزگار کے مواقع پیدا کرتا ہے جس پرٹیکس بڑھانا یا ڈیوٹی ڈرا بیک میں کمی شدید نقصان دہ ثابت ہو گی۔

اس شعبہ کی برآمدات میں اضافہ ہورہا تھا مگراب پالیسی میں تبدیلی کے سبب برآمدات میں کمی آئے گی کیونکہ اب متعلقہ ایس آراو میں تبدیلی کرکے آلات جراحی کی برآمد پرڈیوٹی ڈرا بیک / چھوٹ کی واپسی کو 4.86 فیصد سے کم کرکے 1.58 فیصد کردیا گیا ہے جس سے آلات جراحی کی پوری صنعت میں خوف وہراس پھیل گیا ہے۔ میاں زاہد حسین نے کہا کہ پاکستان میں سرجیکل کی صنعت ملک کے لائٹ انجینئرنگ کے شعبے میں سب سے زیادہ زرمبادلہ کما رہی ہے اوریہ صنعت خام مال کی قیمت، بدلتی ہوئی ٹیکنالوجی، نئے بین الاقوامی معیارات، بھارت، چین اورویتنام کی برآمدی منڈیوں میں مسابقت سمیت مختلف چیلنجوں کی وجہ سے اپنی بقا کے لیے جدوجہد کررہی ہے اس لیے اس کی سرپرستی کی جانی چاہیے۔

حکومت کو چاہیے کہ اس صنعت کی ترقی کے لیے ریسرچ اینڈ ڈویلپمنٹ اور جدت کے لیے فنڈز فراہم کرے۔ میاں زاہد حسین نے مذید کہا کہ ایف بی آرکا ڈیوٹی ڈرا بیک / ریبیٹ کی واپسی میں کمی کا فیصلہ اس شعبے کی برآمدات کومتاثرکرے گا اوراس کے نتیجے میں برآمدی منڈی پاکستان کے ہاتھ سے چھن سکتی ہے۔ حکام کو ایسے فیصلے نہیں کرنے چاہئیں جوایس ایم ایزکے تابوت میں آخری کیل ثابت ہوں۔حکومت برآمدی صنعتوں کی سرپرستی کرے اورآلاتِ جراحی کی تیاری کا دنیا کا سب سے بڑا مرکزجواپنی پیداوار کا تقریباً 50 فیصد یورپ اور25 فیصد امریکہ کو برآمد کررہا ہے اسکو نقصان نہ پہنچائے۔