کیا شعیب ملک اگلے پی ایس ایل میں کوئٹہ گلیڈی ایٹرز میں جا رہے ہیں؟

لاہور (اردو پوائنٹ تازہ ترین اخبار ۔ 19 اپریل 2022ء ) پاکستان کے سابق کپتان شعیب ملک کے پاکستان سپر لیگ (پی ایس ایل) کے آئندہ ایڈیشن میں کوئٹہ گلیڈی ایٹرز کی نمائندگی کرنے کا امکان ہے۔ آل راؤنڈر نے ساتویں ایڈیشن میں پشاور زلمی کی نمائندگی کی اور اپنی ٹیم کے لیے مسلسل رنز بنانے والے کھلاڑی رہے۔ حال ہی میں پاکستان کے بائیں ہاتھ کے بلے باز فواد عالم نے اپنے آفیشل ٹوئٹر اکاؤنٹ پر چند تصاویر پوسٹ کی ہیں جن میں گلیڈی ایٹر کے کپتان سرفراز احمد، مالک ندیم عمر اور شعیب ملک کو بات چیت میں مصروف دیکھا جا سکتا ہے۔

ایک کیپشن میں فواد عالم نے لکھا کہ سرفراز اور ندیم دونوں ہی ’سب سے موزوں نوجوان‘ ملک کو پاکستان سپر لیگ (پی ایس ایل) کے آٹھویں ایڈیشن میں کوئٹہ کی نمائندگی کرنے پر راضی کر رہے ہیں۔

(جاری ہے)

تجربہ کار آل راؤنڈر گزشتہ دو دہائیوں سے پاکستان کے لیے کھیل رہے ہیں اور اس وقت وہ واحد فعال کرکٹر ہیں جنہوں نے اپنے کیریئر کا آغاز 90 کی دہائی میں کیا۔

شعیب نے پاکستان کے لیے متعدد فتوحات میں اہم کردار ادا کیا ہے اور وہ اب بھی کرکٹ کے مختصر ترین فارمیٹ کا حصہ ہیں۔ پاکستان سپر لیگ میں آل راؤنڈر ملتان سلطانز، کراچی کنگز اور پشاور زلمی کی نمائندگی کر چکے ہیں۔ گزشتہ ایڈیشن میں ملک نے 11 میچوں میں مجموعی طور پر 401 رنز بنائے اور اپنی ٹیم کے لیے 3 وکٹیں حاصل کیں۔ شعیب ملک کو ٹی 20 فارمیٹ کا ماہر سمجھا جاتا ہے اور وہ بگ بیش لیگ، انڈین پریمیئر لیگ، بنگلہ دیش پریمیئر لیگ، کیریبین پریمیئر لیگ، مزانسی سپر لیگ، پاکستان سپر لیگ، اور کچھ دیگر سمیت مختلف لیگز میں کھیل چکے ہیں۔

مجموعی طور پر 40 سالہ شعیب ملک نے 472 ٹی ٹونٹی میچز میں 36.55 کی اوسط سے 11698 رنز بنائے ہیں۔ انہوں نے 27.75 کی اوسط سے 158 وکٹیں بھی حاصل کی ہیں۔ شعیب ملک نے اپنے T20 کیریئر میں 71 نصف سنچریاں اور دومرتبہ اننگز میں پانچ وکٹیں حاصل کیں۔