دھان کے کاشتکاروں کو سبسڈی کی فراہمی جاری ہے،ترجمان محکمہ زراعت

جمعہ 6 مئی 2022 17:38

لاہور (اُردو پوائنٹ اخبارتازہ ترین - اے پی پی۔ 06 مئی2022ء) ترجمان محکمہ زراعت پنجاب کے مطابق دھان کی فی ایکڑ پیداوار میں اضافہ کے قومی منصوبہ پر عملدرآمد جاری ہے جس کے تحت پنجاب کے 15اضلاع گوجرانوالہ، شیخوپورہ، اوکاڑہ، سیالکوٹ، ننکانہ صاحب،بہاولنگر، جھنگ، نارووال، قصور، چنیوٹ، گجرات، لاہور، حافظ آباد، فیصل آباد اور منڈی بہاالدین میں دھان کی منتخب اقسام کے بیج پررجسٹرڈ کاشتکاروں کو سبسڈی فراہم کی جارہی ہے۔

یہ سبسڈی منتخب باسمتی اقسام سپر باسمتی،باسمتی 515،پی کے 1121(ایرومیٹک)،کسان باسمتی،سپر باسمتی 2019 اور سپرگولڈ جبکہ غیر باسمتی اقسام کے ایس کے 133،پی کے 386، نیاب اری۔9،کے ایس 282-اور اری 6-پر دی جارہی ہے۔دھان کی منظور دہ اقسام میں باسمتی اقسام پر 1200روپے فی تھیلہ اور غیر باسمتی اقسام پر 800روپے فی تھیلہ سبسڈی دی جارہی ہے۔

(جاری ہے)

یہ سبسڈی تھیلوں میں موجود واچر کے ذریعے صرف رجسٹرڈ کسانوں کو فراہم کی جائے گی۔

غیر رجسٹرڈ کاشتکار رجسٹریشن کے لیے محکمہ زراعت (توسیع)کے مقامی دفاتر سے رابطہ کریں۔ ترجمان محکمہ زراعت پنجاب نے مزید بتایا کہ دھان کے کاشتکار سبسڈی حاصل کرنے کے لیے واچر والا تھیلا اپنے قریبی ڈیلر سے طلب کریں۔ ایک کاشتکار ایک تھیلے پرپہلے آئیں پہلے پائیں کی بنیاد پر سبسڈی حاصل کرسکتا ہے۔کاشتکار دھان کی زیادہ پیداوار کے لئے منظور شدہ اقسام کا بیج استعمال کریں اورفی ایکڑ زیادہ پیداوار کے لئے محکمہ زراعت کی منظور کر دہ اقسام کا بیج استعمال کریں۔دھان کے کاشتکار20 مئی سے قبل پنیری ہر گز کاشت نہ کریں اور ممنوعہ اقسام کی کاشت سے گریز کریں۔