ڈپٹی کمشنر فیصل آباد لیفٹیننٹ(ر)سہیل اشرف نے اپنے عہدے کا چارج سنبھال لیا

فیصل آباد (اُردو پوائنٹ اخبارتازہ ترین - اے پی پی۔ 23 مئی2022ء) فیصل آباد کے لئے نئے تعینات ہونے والے ڈپٹی کمشنر لیفٹیننٹ(ر)سہیل اشرف نے اپنے عہدے کا چارج سنبھال لیا۔انہوں نے اپنے دفتر میں ایڈیشنل ڈپٹی کمشنرز،اسسٹنٹ کمشنرز اورسٹاف سے ملاقات کی اور انہیں دفتری نظم وضبط ودیگر دفتری امور کے بارے میں اپنی ترجیحات سے آگاہ کیا۔ انہوں نے کہا کہ اعلی نظم و نسق کو برقرار رکھنے،عوامی ریلیف، ضلعی تعمیر و ترقی اور عوامی فلاح و بہبود کے سلسلے میں حکومت پالیسیوں پر موثر انداز میں عملدرآمد کو یقینی بنایا جائے۔

انہوں نے ہدایت کی کہ دفتری امور کی انجام دہی میں شفافیت اور دیانتداری کو برقرار رکھا جائے۔ انہوں نے محکمانہ سروسز کے معیار میں مزید اضافہ کرنے اور عوامی مسائل کے تیز رفتار حل پر زور دیا۔

(جاری ہے)

بعدازاں ڈپٹی کمشنر نے ڈسٹرکٹ ہیلتھ اتھارٹی سے محکمانہ بریفنگ لی۔ایڈیشنل ڈپٹی کمشنر ہیڈ کوارٹرز کاشف رضا اعوان بھی موجود تھے۔سی ای او ہیلتھ ڈاکٹر بلال احمدنے ہیلتھ فسیلیٹز کی تعداد،دستیاب بیڈز کی صورتحال،انسداد پولیو،ڈینگی،عطائیت مہم پر عملدرآمد،ضلعی وتحصیل ایمرجنسی رسپانس کمیٹیز کے اجلاسز کے انعقاد ودیگر اقدامات سے تفصیلی بریفنگ دی۔

ڈپٹی کمشنر نے انڈیکیٹرز پر ذمہ دارانہ عملدرآمد کی تاکید کرتے ہوئے کہا کہ ڈینگی کے انسداد کے لئے موثر اور نتیجہ خیز اقدامات نظر آنے چاہیں۔۔ڈپٹی کمشنر نے ڈسٹرکٹ ایجوکیشن اتھارٹی کی بریفنگ لیتے ہوئے سکولوں میں تدریسی وانتظامی امور کو بہتر سے بہتر بنانے کی ہدایت کی اور کہا کہ طالب علموں کو معیاری تعلیم کی فراہمی کے ساتھ جدید خطوط پر تربیت کے لئے کوششیں کی جائیں اس ضمن میں ہیڈ ٹیچرزکو مزید متحرک کریں۔

انہوں نے ایجوکیشن کی جاری ترقیاتی سکیموں کو تیز رفتاری سے مکمل کرنے کا بھی حکم دیا۔سی ای او ایجوکیشن علی احمد سیان نے بتایا کہ ضلع میں 2211 بوائز وگرلز سکولوں میں 8 لاکھ 77 ہزار 196 بچے انرول ہیں۔انہوں نے ٹیچنگ ونان ٹیچنگ سٹاف،پرائیویٹ سکولز کی تعداد،پنجاب ایجوکیشن انشی ایٹو اتھارٹی،انصاف آفٹر نون سکولوں کی تعداد،لٹریسی کے اداروں،شکایات کے حل،شجرکاری مہم وترقیاتی پروگرام کی بھی تفصیلات سے آگاہ کیا۔

ڈپٹی کمشنر نے میٹروپولیٹن کارپوریشن،ضلع کونسل اور فیصل آباد ویسٹ مینجمنٹ کمپنی کی ورکنگ پر بھی بریفنگ لی۔ڈپٹی کمشنر نے کہا کہ شہریوں کو میونسپل سروسز کی فراہمی کے لئے اقدامات کریں اس ضمن میں میٹروپولیٹن کارپوریشن ودیگر ادارے اور اسسٹنٹ کمشنرز کی مکمل کوآرڈینیشن ناگزیر ہے۔انہوں نے کہا کہ سو فیصد احساس ذمہ داری اور جذبہ خدمت کے تحت سروسز فراہم کرنا اولین ایجنڈا ہے۔انہوں نے شہر بھر میں صفائی کا اعلی ترین معیار ہمہ وقت برقرار رکھنے کی تاکید کی اور کہا کہ وہ صفائی کی صورتحال کو خود بھی چیک کریں گے۔