عبداللہ شلح کی برسی پراسماعیل ھنیہ کا مرحوم رہ نما کو خراج عقیدت

رمضان عبداللہ شلح ایک ایسے لیڈر تھے جن کے دل میں فلسطین سے محبت تھی،حماس کابیان

منگل 7 جون 2022 15:25

دوحا (اُردو پوائنٹ اخبارتازہ ترین - این این آئی۔ 07 جون2022ء) اسلامی جہاد کے سابق سیکرٹری جنرل عبداللہ شلح مرحوم کی دوسری برسی کے موقعے پراسلامی تحریک مزاحمت (حماس)کے سیاسی شعبے کے سربراہ اسماعیل ھنیہ نے شلح کی خدمات کو شاندار الفاظ میں خراج عقیدت پیش کیا ہے۔میڈیارپورٹس رمضان عبداللہ شلح کی دوسری برسی کے موقع کی مناسبت سے جاری ایک بیان میں اسماعیل ھنیہ نے کہا کہ دوسال قبل چھ جون 2020 کو ہم ایک عظیم لیڈر، قوم کے خیر خواہ اور عظیم انسان سے محروم ہوگئے۔

انہوں نے کہا کہ رمضان عبداللہ شلح ایک بہادر لیڈر، جرات مند قائد، پر عزم مجاھد، محبت وایثار کے پیکر، جذبہ قربانی سے لبریز، بلند ہمت اور فراخ دل انسان تھے۔انہوں نے مزید کہاکہ رمضان عبداللہ شلح ایک ایسے لیڈر تھے جن کے دل میں فلسطین سے محبت تھی اور وہ پوری زندگی قوم کی خدمت اور ملک کی آزادی کے لیے سراپا جدو جہد رہے۔

(جاری ہے)

انہوں نے کہا کہ مرحوم رہ نما ہمیشہ قومی اتحاد کے داعی تھے۔

وہ پوری قوم کے تمام طبقات کو مشترکات پر اکھٹا کرنے کام عزم لیے اس دنیا سے رخصت ہوئے۔اسماعیل ھنیہ نے قابض ریاست کے خلاف فلسطینی قوم کی مزاحمت میں خدمات انجام دینے پر انہیں خراج عقیدت پیش کیا۔ ان کا کہنا تھا کہ مرحوم زندگی بھر قابض دشمن کے خلاف آزادی کی تحریک کے ہراول دستے کا حصہ رہے اور ہر محاذ پر دشمن کے خلاف مسلح جدو جہد میں حصہ لیا۔