عمران نیازی کے اقتدار کی وکٹ بیرونی سازش سے نہیں بلکہ مولانا فضل الرحمن کی زور دار باونسر سے گری ،ترجمان پی ڈی ایم

ڈی جی آئی ایس پی آر کی بار بار وضاحت نے عمران نیازی کیجھوٹے بیانیہ کے غبارے سے ہوا نکال دی ،حافظ حمداللہ کا بیان

جمعرات 16 جون 2022 17:45

اسلام آباد (اُردو پوائنٹ اخبارتازہ ترین - این این آئی۔ 16 جون2022ء) سابق وزیر اعظم عمران نیازی کی ڈی جی آئی ایس پی آر پر تنقیدی ردعمل پر ترجمان پی ڈی ایم حافظ حمداللہ نے کہاہے کہ عمران نیازی کے اقتدار کی وکٹ بیرونی سازش سے نہیں بلکہ مولانا فضل الرحمن کی زور دار باونسر سے گری ۔ اپنے بیان میں حافظ حمد اللہ نے کہاکہ ڈی جی آئی ایس پی آر کی بار بار وضاحت نے عمران نیازی کیجھوٹے بیانیہ کے غبارے سے ہوا نکال دی ۔

(جاری ہے)

انہوںنے کہاکہ جب عسکری ترجمان کی وضاحت سے عمران نیازی کے جھوٹے بیانیہ کا پردہ پاش ہوا تو وہ اسے سیاست قرار دینے لگے ۔ انہوںنے کہاکہ عمران نیازی نے اپنی حکومت میں تحقیق کے لئے جوڈیشل کمیشن کیوں نہیں بنائی ،اگر انکے ایک جھوٹ پر جوڈیشل کمیشن بنانا ضروری ہے تو پھر انکے ہر جھوٹ پر جوڈیشل کمیشن بنانا ہوگا جوکہ نا ممکن ہے ،اب صفحہ ایک نہیں رہا گیٹ نمبر چار کا دروازہ تو کیا آنیا جانیا بھی بند ہے ۔ حافظ حمد اللہ نے کہاکہ عمرانی ٹولہ اور شیخ رشید کی خواہش ہیں کہ اس دروازہ سے کمک اور نصرت جاری رہیں ،پی ڈی ایم اتحادی ٹیم عمران نیازی پر پاکستانی سیاست کے دروازے بھی بند کرینگے ۔