چوہدری وجاہت کے الزامات ، یہ نہایت بے بہودہ باتیں ہیں ، چوہدری شجاعت حسین

اسلام آباد (اُردو پوائنٹ اخبارتازہ ترین - این این آئی۔ 25 جون2022ء) پاکستان مسلم لیگ (ق) کے سربراہ چوہدری شجاعت حسین نے اپنے چھوٹے بھائی چوہدری وجاہت حسین کی جانب سے بیٹوں پر لگائے گئے الزامات پر کہا ہے کہ اگر چوہدری وجاحت حسین نے یہ باتیں کی ہیں تو یہ نہایت بہودہ باتیں ہیں،میں نے اپنے بیٹوں کی ایسی تربیت نہیں کی،میرے کہنے پر میرے بچے فی الحال خاموش ہیں،پاکستان میں پہلے بھی سینکڑوں پارٹیاں بنی ہوئی ہیں ایک اور بن جائے گی تو کیا فرق پڑے گا۔

ٹوئٹر پر اپنے بیان میں انہوںنے کہاکہ میرے چھوٹے بھائی چودھری وجاہت حسین نے ہمارے گھر گجرات میں لوگوں سے چند باتیں کی ہیں۔ انہوںنے کہاکہ نیشنل لیول کے ایک بڑے لیڈر آصف علی زرداری کے متعلق الزام تراشی کی ہے اور میرے بیٹوں پر الزام لگایا ہے کہ انہوں نے ڈالر مانگے ہیں، اگر انہوں نے یہ باتیں کی ہیں تو یہ نہایت بہودہ باتیں ہیں۔

(جاری ہے)

چوہدری شجاعت حسین نے کہاکہ میں نے اپنے بیٹوں کی ایسی تربیت نہیں کی۔

میرے کہنے پر میرے بچے فی الحال خاموش ہیں۔ انہوںنے کہاکہ میں نے ان کو تلقین کی ہوئی ہے کہ ہمیشہ سچ بولنا ہے اور وعدے کا پاس رکھنا ہے۔ انہوںنے کہاکہ میرے کہنے پر ہی اپوزیشن کے متفقہ امیدوار وزیراعظم شہباز شریف کو ووٹ ڈالا تھا ہم نے کسی سے کوئی وزارت نہیں مانگی۔انہوںنے کہاکہ آصف علی زرداری نے خود آکر ہمیں مبارکباد دی تھی۔ چوہدری شجاعت حسین کے مطابق چودھری وجاہت حسین نے یہ بھی کہا ہے کہ 30 جون تک اگر مسلم لیگ ن سے ہم نے اتحاد ختم نہ کیا تو وہ نئی جماعت بنا لیں گے۔

انہوںنے کہاکہ پاکستان میں پہلے بھی سینکڑوں پارٹیاں بنی ہوئی ہیں ایک اور بن جائے گی تو کیا فرق پڑے گا۔انہوںنے کہاکہ چودھری وجاہت نے یہ بھی کہاہے کہ سیکرٹری جنرل و وفاقی وزیر طارق بشیر چیمہ نے ہمارے خاندان کو تقسیم کردیاہے،طارق بشیر چیمہ کے متعلق جو بیان دیاہے وہ غیر اخلاقی اور جھوٹ پر مبنی ہے، چودھری وجاہت نے الزام لگایا ہیک ہ میرے بیٹے مانگے تانگے کے وزیر بنے ہوئے ہیں اور انکا کوئی حلقہ نہیں ہے،میں ان باتوں کا جواب کسی وقت گجرات جا کر گجرات والوں کے سامنے دوں گا اور بتاؤں گا کہ کس کا کون سا حلقہ ہے۔