راوی اربن ڈویلپمنٹ پراجیکٹ کاروباری اور معاشی سرگرمیوں کو فروغ دینے میں اہم کردار ادا کرے گا،صدر ایوان تجارت لاہور

لاہور (اُردو پوائنٹ اخبارتازہ ترین - اے پی پی۔ 08 فروری2023ء) لاہور چیمبرآف کامرس اینڈ انڈسٹری کے صدر کاشف انور نے کہا ہے کہ تمام صنعتیں بالواسطہ یا بلاواسطہ تعمیراتی شعبہ کے ساتھ وابستہ ہیں ، توقع ہے کہ راوی اربن ڈویلپمنٹ پراجیکٹ کاروباری اور معاشی سرگرمیوں کو فروغ دینے میں اہم کردار ادا کرے گا، اس پراجیکٹ سے متعلق تاجر برادری کے حقیقی تحفظات دور کیے جائیں۔

وہ بدھ کو لاہور چیمبر آف کامرس اینڈ انڈسٹری میں راوی اربن ڈویلپمنٹ اتھارٹی کے ایگزیکٹو ڈائریکٹر کمرشل کاشف قریشی سے گفتگو کر رہے تھے۔ اس موقع پر منیجر انویسٹر ریلیشنز راوی اربن ڈویلپمنٹ اتھارٹی سمیرا ملک نے بھی خطاب کیا۔لاہور چیمبر کے صدر نے کہا کہ جب تک تعمیراتی شعبہ کام نہیں کرے گا معیشت ترقی نہیں کر سکتی۔

(جاری ہے)

انہوں نے کہا کہ اگر معیشت مشکل میں ہے تو بڑے تعمیراتی منصوبے شروع کیے جائیں کیونکہ ان سے تجارتی اور اقتصادی سرگرمیوں کو فروغ ملتا ہے۔

انہوں نے کہا کہ لاہور چیمبر آف کامرس اینڈ انڈسٹری کے 32 ہزار ممبران اور اس میگا پراجیکٹ کی وجہ سے جن صنعتوں کی نقل مکانی متوقع ہے ،انہیں اس منصوبے کے بارے میں زیادہ معلومات نہیں لہذاآگاہی یقینی بنائی جائے۔ انہوں نے کہا کہ لاہور چیمبر کے ممبران اور سٹاف کو پراجیکٹ میں سرمایہ کاری کے مواقع فراہم کیے جائیں۔لاہور چیمبر کے صدر نے کہا کہ موٹرویز کے ذریعے منڈیوں کو کھیتوں سے منسلک کرنا ہوگا اور معاشی و سماجی مسائل حل کرنے کے لیے نئے شہر قائم کرنا ہونگے۔

انہوں نے راوی اربن ڈویلپمنٹ اتھارٹی کے ساتھ مضبوط رابطہ کو یقینی بنانے کے لیے فوکل پرسنز کا تقرر بھی کیا۔انہوں نے کہا کہ راوی اربن ڈویلپمنٹ پراجیکٹ بہت اہمیت کا حامل ہے کیونکہ اس سے رئیل اسٹیٹ اور تعمیراتی صنعت کو بے پناہ فروغ حاصل ہوگا تاہم سٹیک ہولڈرز کے تحفظات دور کرنا ضروری ہے۔ اس موقع پر راوی اربن ڈویلپمنٹ اتھارٹی کے ایگزیکٹو ڈائریکٹر کاشف قریشی نے پراجیکٹ کے بارے میں تفصیلی پریذنٹیشن دی ۔

انہوں نے لاہور چیمبر کے صدر کو بتایا کہ راوی اربن ڈویلپمنٹ اتھارٹی جولائی 2020 میں پارلیمنٹ کے ایک ایکٹ کے تحت وجود میں آئی تھی ،راوی اربن ڈویلپمنٹ پراجیکٹ کے بارے میں انہوں نے کہا کہ یہ 46 کلومیٹر طویل ریور فرنٹ سٹی ہے جس کا کل رقبہ 110,604 ایکڑ ہے جسے 10 ملین رہائشیوں کے لیے تیار کیا جائے گا اور اس منصوبے کو 3مرحلوں میں مکمل کیا جانا ہے۔