برطانیہ، مسلمان فٹبالرز کو میچ روک کر افطار کیلئے وقت دینے کی تجویز

پریمیئر لیگ اور انگلش فٹبال لیگ کی انتظامیہ روزے دار فٹبالرز کو افطار کیلئے کھیل سے وقفہ دے: ریفریز باڈی

ذیشان مہتاب جمعرات 23 مارچ 2023 14:43

برطانیہ، مسلمان فٹبالرز کو میچ روک کر افطار کیلئے وقت دینے کی تجویز

لندن (اردو پوائنٹ تازہ ترین اخبار ۔ 23 مارچ 2023ء ) برطانیہ میں ہونے والی دو بڑی فٹبال لیگز میں شریک مسلمان فٹبالرز کو دوران میچ افطار کرنے کا موقع فراہم کرنے کی تجویز سامنے آئی ہے۔ دنیا بھر کے زیادہ تر ممالک میں رمضان کا آغاز ہو چکا ہے اور اس مقدس مہینے میں دنیا بھر سے تقریباً ایک ارب سے زائد مسلمان رمضان المبارک کے روزے رکھتے ہیں جن میں دیگر کھلاڑیوں کی طرح مسلم فٹبالرز بھی شامل ہیں۔

برطانوی خبر رساں ادارے سکائی نیوز کے مطابق ریفریز باڈی کی جانب سے پریمیئر لیگ اور انگلش فٹبال لیگ کے عہدیداران کو تجویز پیش کی گئی ہے کہ لیگ انتظامیہ روزے دار فٹبالرز کو افطار کے لیے کھیل سے وقفہ دے، اس دوران فٹبالر کو پانی، انرجی فوڈ اور سپلیمینٹ لینے کی اجازت دی جائے۔

(جاری ہے)

ریفریز باڈی کی جانب سے دی گئی تجویز میں یہ بھی کہا گیا ہے کہ وہ میچ سے پہلے روزے دار فٹبالر کی شناخت کریں اور بعد ازاں ان کی افطار کے لیے کوئی ایک وقت مقرر کریں۔

واضح رہے کہ لیور پول کے محمد صلاح، چیلسی کے این گولو کینٹے اور مانچسٹر سٹی کے ریاض مہریز ایسے فٹبالر ہیں جو ماہ رمضان میں میچ کے دوران بھی روزے رکھتے ہیں۔ خیال رہے کہ 2021ء میں ہونے والی پریمیئر لیگ میں بھی ٹیم کی درخواست پر کھلاڑیوں کو مغرب کے بعد افطار کیلئے آدھے گھنٹے کا وقفہ دیا جاچکا ہے۔