Live Updates

کوہلی نے اچانک ریٹائرمنٹ کیوں لی سب سے سنگین وجہ سامنے آ گئی

چندروز قبل جاری رکھنے کا اعلان کیا تھا،سب سے سنگین اور اہم وجہ بھارتی کرکٹ بورڈ سے ناراضگی ہے‘رپورٹ

منگل 13 مئی 2025 14:09

کوہلی نے اچانک ریٹائرمنٹ کیوں لی سب سے سنگین وجہ سامنے آ گئی

نئی دہلی (اُردو پوائنٹ اخبارتازہ ترین - این این آئی۔ 13 مئی2025ء)روہت شرما کے بعد ویرات کوہلی نے بھی ٹیسٹ کرکٹ سے ریٹائرمنٹ لے لی تاہم ان کی ریٹائرمنٹ کے پیچھے اہم سنگین وجہ سامنے آ گئی ہے۔بھارت کو ایک سال سے بھی کم عرصہ میں اپنی قیادت میں دو آئی سی سی ٹرافی جتوانے والے کپتان روہت شرما نے گزشتہ دنوں ٹیسٹ کرکٹ سے ریٹائرمنٹ لے لی تھی۔اب ٹیم کے سینئر ترین کھلاڑی ویرات کوہلی نے بھی اچانک ٹیسٹ کرکٹ سے ریٹائرمنٹ کا اعلان کر دیا ہے۔

تاہم ویرات کوہلی جو حال ہی میں ابھی مزید ٹیسٹ کرکٹ کھیلنے کا عندیہ دے چکے تھے۔ ان کی اچانک اس ریٹائرمنٹ کے پیچھے چھپی سنگین وجہ سامنے آ گئی ہے۔بھارتی میڈیا کے مطابق ویرات کوہلی کے اچانک ٹیسٹ کرکٹ سے ریٹائرمنٹ لینے کی کئی وجوہات ہیں۔

(جاری ہے)

ان میں سے سب سے سنگین اور اہم وجہ بھارتی کرکٹ بورڈ سے ناراضگی ہے۔رپورٹ کے مطابق روہت شرما کی ٹیسٹ کرکٹ سے ریٹائرمنٹ کے اعلان کے بعد دورہ انگلینڈ کے لیے بھارتی ٹیم کے ایک سینئر کھلاڑی (ممکنہ طور پر ویرات کوہلی) نے قیادت کرنے کی خواہش کا اظہار کیا تھا، تاہم بھارتی کرکٹ بورڈ کی جانب سے انکار کر دیا.اب اچانک ویرات کی جانب سے ٹیسٹ فارمیٹ سے ریٹائرمنٹ کے اعلان کے بعد یہ چہ مہ گوئیاں ہو رہی ہیں کہ کہیں وہ کھلاڑی ویرات تو نہیں تھے۔

جس کی سب سے بڑی وجہ یہ بتائی جا رہی ہے کہ چند روز قبل ہی انہوں نے ٹیسٹ کرکٹ جاری رکھنے کا اعلان کیا تھا۔بھارتی میڈیا کے مطابق روہت شرما کے بعد ویرات کوہلی کے اچانک ٹیسٹ کرکٹ سے ریٹائرمنت لینے کی دوسری بڑی وجہ اس فارمیٹ میں انکی طویل عرصہ سے خراب فارم اور حالیہ دورہ آسٹریلیا میں مایوس کن کارکردگی ہے۔