کاشتکار ادرک کی کاشت فوری طور پر شروع کرکے اپریل کے ۱ٓخر تک مکمل کرسکتے ہیں، ڈپٹی ڈائریکٹرزراعت

اتوار 26 مارچ 2023 13:00

فیصل آباد (اُردو پوائنٹ اخبارتازہ ترین - اے پی پی۔ 26 مارچ2023ء) محکمہ زراعت توسیع فیصل آباد کے ڈپٹی ڈائریکٹر چوہدری خالد محمود نے کاشتکاروں کو ادرک کی بہترین پیداوار کے حصول کیلئے فصل میں 150 کلو گرام سپر فاسفیٹ، 150 کلوگرام امونیم سلفیٹ اور 100کلوگرام پوٹاشیم سلفیٹ فی ایکڑ ڈالنے کی ہدایت کرتے ہوئے بتایا ہے کہ ادرک کالی کھانسی، پھیپھڑوں کی ٹی بی اور بعض دیگر بیماریوں کیلئے بہترین علاج ہے جو حافظہ بھی بڑھاتا اور دل و جگرکو تقویت دیتا ہے لہٰذا کاشتکار ادرک کی کاشت فوری طور پر شروع کردیں۔

(جاری ہے)

انہوں نے بتایاکہ ادرک کا شمار مصالحہ دار سبزیوں میں ہوتا ہے جو اپنے مخصوص ذائقہ اور مہک کی بنا پر عوام الناس میں بے حد مقبول ہے۔ انہوں نے کہاکہ ادرک کی کاشت مارچ کے اواخر میں شروع کر کے اپریل کے وسط تک مکمل کی جاسکتی ہے۔ انہوں نے بتایاکہ ادرک کی کاشت کیلئے ایسی زمین بہترین نتائج کی حامل ہو تی ہے جو ذرخیز میرا ہونے کے ساتھ ساتھ پانی کے اچھے نکاس اور ہواکے گزر کی صلاحیت رکھتی ہو۔ انہوں نے کہاکہ کاشتکار ادرک کی کاشت سے قبل زمین کو اچھی طرح ہموار کر کے اس میں 40سے50گڈے فی ایکڑ گوبر کی گلی سڑی کھاد ڈال کر دو سے تین مرتبہ ہل چلائیں اور سہاگہ دے کر زمین اچھی طرح تیار کرلیں۔