اعلی اقدار کے حامل تعلیمی ادارے ہمیشہ قوموں کی تعمیر وترقی میں کلیدی کردار ادا کرتے ہیں،بلیغ الرحمان

لاہور (اُردو پوائنٹ اخبارتازہ ترین - این این آئی۔ 01 اپریل2023ء) گورنر پنجاب/پریذیڈنٹ بورڈ آف گورنرز محمد بلیغ الرحمن سے گورنر ہائوس لاہور میں صادق پبلک سکول کے نئے تعینات ہونے والے پرنسپل ڈیوڈ ڈاوڈلز نے ملاقات کی۔گورنر پنجاب نے پرنسپل کو عہدہ سنبھالنے پر نیک خواہشات کا اظہار کیا۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ تعلیم خوشحال مستقبل اور ترقی یافتہ معاشرے کی ضامن ہے۔

انہوں نے کہا کہ اعلی اقدار کے حامل تعلیمی ادارے ہمیشہ قوموں کی تعمیر اور ترقی میں کلیدی کردار ادا کرتے ہیں۔ گورنر پنجاب نے کہا کہ صادق پبلک سکول کو پاکستان اور دنیا کے ایک بہترین تعلیمی ادارے کے طور پر روشناس کرانا ہے اور تعلیم کے معیار کو مزید بلند کرنا ہے۔

(جاری ہے)

گورنر پنجاب نے نئے تعینات ہونے والے پرنسپل کو ادارے میں تعلیم کی بہتری کے لیے اہداف دیتے ہوئے کہا کہ سکول کے اندر تدریسی نظام، انفراسٹریکچر اور مالی معاملات سمیت دیگر امور کی بہتری کے لئے بھر پور طریقے سے اقدامات اٹھائے جائیں۔

انہوں نے مزید کہا کہ طلبا کو اچھی تعلیم کے علاوہ ان کی اخلاقی تربیت اور کردار سازی پر بھی توجہ دینے کی ضرورت ہے۔اس موقع پر صادق پبلک سکول کے ایلومینائی نے اس عزم کا اظہار کیا کہ صادق پبلک سکول کی بہتری کے لیے ہر طرح سے تعاون کریں گے۔اس موقع پر صادق پبلک سکول کے ایلومینائی اور بورڈ آف گورنرز کے ممبران ،سابق ایم این اے، اسحاق خاکوانی ، سی سی او پاک ویلز رضا سعید، فضیل اصغر، راحیل صدیقی، ڈاکٹر پرویز حسن، اورنگزیب عالمگیر، سجاد منیر، نوشین حنیف اور محمد ایوب گھلو موجود تھے۔