ہزارہ یونیورسٹی مانسہرہ کے شعبہ آثار قدیمہ کے زیر اہتمام ثقافتی ورثہ کا عالمی دن منایا گیا

منگل 18 اپریل 2023 18:30

مانسہرہ (اُردو پوائنٹ اخبارتازہ ترین - اے پی پی۔ 18 اپریل2023ء) ہزارہ یونیورسٹی مانسہرہ کے شعبہ آثار قدیمہ کے زیر اہتمام ثقافتی ورثہ کا عالمی دن منایا گیا۔ اس حوالے سے ایک تقریب کا انعقاد کیا گیا، جس میں گورنمنٹ ہائر سکینڈری سکول بفہ کے پرنسپل واجد اقبال ، محمد سلیم بجوری سائبان ڈویلپمنٹ آرگنائزیشن کے سربراہ جواد الفیضی عسکری فاؤنڈیشن سکول بفہ دوراہا اور ہائر سکینڈری سکول بفہ سمیت دیگر تعلیمی اداروں کے سربراہان ، سماجی شخصیات اور کثیر تعداد میں طلباء اور طالبات نے شرکت کی۔

یہ دن ہر سال 18 اپریل کو منایا جاتا ہے۔ اس دن کا مقصد ہائر ایجوکیشن کمیشن پاکستان کی رہنمائی اور محکمہ کے انتظامی تعاون سے عالمی ثقافتی ورثے کی بقا اور تحفظ کے حوالے سے شعور اجاگر کرنا ہے۔

(جاری ہے)

اس موقع پر چیئرمین آرکیالوجی ڈاکٹر شاکر اللہ نے مہمانوں کو عجائب گھر میں موجود آثار قدیمہ اور قدیم ورثے کی باقیات سمیت علاقائی ثقافتی کے بارے میں تفصیل سے آگاہ کیا۔

انہوں نے کہا کہ ثقافتی ورثہ صرف ماضی کی چیز نہیں ہے بلکہ اس کا تعلق آپ کے حال اور مستقبل سے بھی جُڑا ہوتا ہے۔انہوں نے کہا کہ ہزارہ یونیورسٹی کے شعبہ آثار قدیمہ میں باقاعدگی کے ساتھ اس قسم کی سرگرمیاں منعقد کی جاتی ہیں جن کا مقصد ثقافتی ورثے سمیت اس علاقے کی موجودہ اور قدیم ثقافت سےآگاہی اور ان کے تحفظ کے حوالےسے شعور اجاگر کرنا ہے ۔

انہوں نے مزید کہا کہ ہزارہ یونیورسٹی کا شعبہ آثار قدیمہ خیبر پختونخواہ سمیت ملک بھر میں قدیم ثقافت کے تحفظ اور آثار قدیمہ کی مزید سائٹس کی دریافت سمیت ان سائٹس کو ماحولیاتی تبدیلی قدرتی آفات جیسے خطرات سے محفوظ رکھنے کے لئے اپنی تمام توانائیاں صرف کر رہا ہے۔ اس موقع پر بچوں نے آثار قدیمہ اور قدیم ثقافت کی باقیات میں گہرہ دلچسپی کا اظہار کیا اور ہزارہ یونیورسٹی انتظامیہ بالخصوص شعبہ آثار قدیمہ اور شعبہ کے چئیرمین ڈاکٹر شاکراللہ خان کا شکریہ ادا کیا کہ جنہوں نے اس اہم اور تاریخی دن پر ایک بہترین سرگرمی کا انعقاد کیا۔