رواں مالی سال کے 10 ماہ میں معیشت کا بھرکس نکل گیا

ایکسپورٹس اور ترسیلات زر کی مد میں اربوں ڈالرز کی کمی، مالیاتی خسارہ 2 ہزار 300 ارب روپے سے تجاوز کر گیا

ہفتہ 29 اپریل 2023 22:29

لاہور (اردوپوائنٹ اخبارتازہ ترین۔ 29 اپریل 2023ء) رواں مالی سال کے 10 ماہ میں معیشت کا بھرکس نکل گیا، ایکسپورٹس اور ترسیلات زر کی مد میں اربوں ڈالرز کی کمی، مالیاتی خسارہ 2 ہزار 300 ارب روپے سے تجاوز کر گیا۔ تفصیلات کے مطابق وزارت خزانہ نے رواں مالی سال اپریل کی معاشی رپورٹ جاری کر دی جس کے مطابق اخراجات، مالیاتی خسارہ میں اضافہ، ترسیلات زر، برآمدات، سرمایہ کاری میں کمی ریکارڈ کی گئی۔

رپورٹ میں رواں مالی سال جولائی تا مارچ معاشی کارکردگی کا جائزہ لیا گیا ہے۔ رپورٹ کے مطابق جولائی سے مارچ ترسیلات زر میں 10.8 فیصد کم ہوکر 20.5 ارب ڈالر رہیں جبکہ اسی عرصے کے دوران برآمدات 11 فیصد کم ہو کر 21.1 ارب ڈالر رہی اور مالیاتی خسارہ گزشتہ سال کی نسبت بڑھ کر 2392 ارب روپے ہو گیا۔

(جاری ہے)

وزرات خزانہ کے مطابق گزشتہ مالی سال جولائی سے مارچ مالیاتی خسارہ 2273 ارب روپے تھا، جولائی سے مارچ سالانہ ترقیاتی فنڈز 31 فیصد سے زائد کمی کے ساتھ 287 ارب خرچ ہوئے جبکہ رواں مالی سال جولائی سے مارچ بیرونی سرمایہ کاری میں 98 فیصد کمی ریکارڈ کی گئی۔

رپورٹ کے مطابق رواں مالی سال جولائی سے مارچ زرمبادلہ ذخائر 10 ارب ڈالر رہ گئے جبکہ گزشتہ مالی سال اسی عرصے کے دوران زرمبادلہ ذخائر 16.57 ارب ڈالر تھے۔ وزارت خزانہ کے مطابق رواں مالی سال جولائی سے مارچ مہنگائی کی شرح 27.3 فیصد رہی اور رواں مالی سال ابھی تک درآمدات کا حجم 21 فیصد کمی کے ساتھ 41.5 ارب ڈالر رہا۔ وزارت خزانہ کے مطابق رواں مالی سال جولائی مارچ مہنگائی قابو سے باہر رہی، اسٹیٹ بینک کی جانب سے شرح سود 21 فیصد کرنے کا فائدہ نہ مل سکا جبکہ افراط زر کی شرح 35.4 فیصد تک جا پہنچی اور گزشتہ سال اپریل کے آخر تک یہ شرح 31.5 پر تھی، اشیائے ضروریہ کی قیمتٰ گزشتہ سال کے مقابلے میں 17 فیصد بڑھ گئیں۔