پنجاب میں ریڑھی بانوں کی رجسٹریشن،انہیں سالانہ بنیادوں پر لائسنس جاری کرنے کی منصوبہ بندی شروع

ترقی یافتہ ممالک کی طرح مخصوص علاقوں میں جدید ڈیزائن کی ریڑھیاں لگوانے کیلئے قابل عمل تجاویزطلب کر لی گئیں

ہفتہ 6 مئی 2023 11:30

مکوآنہ (اُردو پوائنٹ اخبارتازہ ترین - این این آئی۔ 06 مئی2023ء) پنجاب میں ریڑھی بانوں کی رجسٹریشن اور انہیں سالانہ بنیادوں پر لائسنس جاری کرنے کی منصوبہ بندی شروع کر دی گئی،ترقی یافتہ ممالک کی طرح مخصوص علاقوں میں جدید ڈیزائن کی ریڑھیاں لگوانے کے لئے قابل عمل تجاویز طلب کر لی گئیں۔اس حوالے سے وزیر اعلیٰ آفس کے سپیشل مانیٹرنگ یونٹ کی سربراہ ڈاکٹر نویرا نے نگران وزیر بلدیات پنجاب ابراہیم مراد سے ملاقات کی۔

اس موقع پر ابراہیم مراد نے کہاکہ ریڑھی بانوں کی رجسٹریشن اور انہیں سالانہ بنیادوں پر لائسنس جاری کرنے کا جائزہ لیا جائے،ترقی یافتہ ممالک کی طرح مخصوص علاقوں میں جدید ڈیزائن کی ریڑھیاں لگوانے کے لئے قابل عمل تجاویز پیش کی جائیں،ریڑھیوں پر کھانے پینے کی چیزیں اور دیگر ضروری اشیا فروخت کی جا سکیں گی،رجسٹریشن اور نمبر پلیٹ لگانے سے ریڑھی بانوں کی عزت افزائی اور ان میں احساس تحفظ پیدا ہوگا،ریڑھیوں کی رجسٹریشن سے مالکان کو مختلف سرکاری اہلکاروں کی بھتہ خوری اور بلیک میلنگ سے نجات ملے گی۔

(جاری ہے)

ابراہیم مراد نے کہا کہ ریڑھی بانوں کے بھتے کی بجائے سالانہ معمولی سرکاری فیس ادا کرنے سے سرکاری خزانے کو بھی فائدہ ہو گا،ریڑھوں کی لئے جگہیں مختص کرنے سے ٹریفک کے بہائو میں بھی بہتری آئے گی، پلان کی کامیابی کی صورت میں نئی ریڑھیاں بھی لگائی جائیں گی جس سے لوگوں کو روزگار کے مواقع ملیں گے۔