اسد حکومت کے بعد بھی شام منشیات کا گڑھ، یو این او ڈی سی

اسلام آباد (اُردو پوائنٹ ۔ UN اردو۔ 27 جون 2025ء) شام میں سابق صدر بشارالاسد کی حکومت پر الزام ہے کہ وہ غیرقانونی کیپٹاگون کی پیداوار اور سمگلنگ میں ملوث رہی جو مشرق وسطیٰ میں سب سے زیادہ استعمال ہونے والی سنتھیٹک منشیات ہے۔ تاہم، موجودہ حکومت کی جانب سے روک تھام کے اقدامات کے باوجود اب بھی شام اس منشیات کی پیداوار اور تقسیم کا بڑا مرکز ہے۔

ملک میں طویل عرصہ تک جاری رہنے والی خانہ جنگی کے دوران اسد حکومت کو عالمی برادری کی معاشی پابندیوں اور سفارتی تنہائی کا سامنا کرنا پڑا۔ کہا جاتا ہے کہ اس دوران سابق آمر اور ان کے اتحادیوں نے کیپٹاگون کی تجارت سے اربوں ڈالر کمائے۔

دسمبر 2024 میں بشارالاسد کے اقتدار کا خاتمہ ہونے اور ہیت تحریر الشام اور دیگر گروہوں کے ارکان پر مشتمل عبوری حکومت قائم ہونے کے بعد منشیات کی تجارت کے حوالے سے ملکی طرزعمل میں تبدیلی آئی۔

(جاری ہے)

تاہم منشیات کے بارے میں تازہ ترین عالمی رپورٹ میں خبردار کیا گیا ہے کہ تمام تر اقدامات کے باوجود شام اب بھی منشیات کا ایک بڑا مرکز ہے۔ یہ رپورٹ اقوام متحدہ کے دفتر برائے انسداد منشیات و جرائم (یو این او ڈی سی) نے جاری کی ہے۔

UN News

'جہادی گولی'

رپورٹ کے اجرا سے قبل ادارے میں سماجی امور کے شعبے کی سربراہ انجیلا می نے یو این نیوز سے بات کرتے ہوئے کہا کہ کیپٹاگون دراصل میتھم فیٹامائن سے ملتا جلتا انگیختہ ہے جسے دوا کی گولی جیسی شکل میں استعمال کیا جاتا ہے۔

دہشت گرد حملوں کا ارتکاب کرنے والے بعض افراد کی جانب سے کیپٹاگون کے استعمال کی اطلاع سامنے آنے کے بعد اسے 'جہادی گولی' بھی کہا جانے لگا ہے۔ یہ میدان جنگ میں توانائی کو برقرار رکھنے میں مددگار ہوتی ہے جو اس کے بڑے پیمانے پر استعمال کی ایک اہم وجہ ہے۔

انہوں نے بتایا کہ حالیہ عرصہ میں شام سے اس منشیات کی بڑی مقدار دوسرے ممالک بالخصوص اردن میں بھیجے جانے کے شواہد ملے ہیں۔ 'یو این او ڈی سی' یہ معلوم کرنے کے لیے کوشاں ہے کہ اب شام میں کیپٹاگون کہاں تیار کی جاتی ہے۔ خطے کے دیگر حصوں میں بھی اس کی سمگلنگ میں اضافہ ہو رہا ہے اور لیبیا میں بھی کیپٹاگون تیار کرنے کی اطلاعات ملی ہیں۔

Mazen Alboni

منافع بخش دھندا

انہوں نے بتایا کہ منشیات کی سمگلنگ سے بھاری منافع حاصل ہوتا ہے اسی لیے شام سمیت پورے خطے میں بہت سے گروہ یہ کام کر رہے ہیں۔

انہوں نے کہا کہ ادارہ رکن ممالک کو منظم جرم کے تناظر میں اس مسئلے پر قابو پانے میں مدد دے رہا ہے تاکہ وہ ضروری اقدامات ترتیب دے سکیں۔ تحقیق سے ثابت ہوتا ہے کہ کسی ایک اقدام سے ان گروہوں کا خاتمہ ممکن نہیں۔

ادارہ مختلف ممالک کے قانون نافذ کرنے والے اداروں کو آپس میں ربط قائم کرنے میں بھی معاونت فراہم کر رہا ہے کیونکہ یہ کسی ایک ملک کا نہیں بلکہ بین الاقوامی مسئلہ ہے۔

انجیلا می نے کہا کہ منشیات استعمال کرنے سے پیدا ہونے والے طبی مسائل پر قابو پانے میں مدد دینا بھی اس مسئلے سے نمٹنے کا ایک طریقہ ہے۔ اس طرح شواہد کی بنا پر ان لوگوں کا ایسے انداز میں علاج کیا جاتا ہے جس کی بدولت انہیں منشیات پر انحصار ختم کرنے میں مدد ملتی ہے۔