ورثائے حریت جموںو کشمیرکامعروف عالم دین حافظ عبدالسلام بن محمد کے انتقال پر اظہارافسوس

جمعہ 2 جون 2023 22:11

سرینگر (اُردو پوائنٹ اخبارتازہ ترین - این این آئی۔ 02 جون2023ء) غیر قانونی طور پر بھارت کے زیر قبضہ جموں و کشمیر میں ورثائے حریت جموںو کشمیر نے معروف عالم دین ،شیخ الحدیث، مفسر قرآن، فضیل الشیخ حافظ عبدالسلام بن محمد بھٹویؒ کی وفات پر گہرے رنج و غم کا اظہار کیا ہے۔ کشمیرمیڈیاسروس کے مطابق عبدالسلام بن محمد بھٹویؒجو ایک عظیم مفسر قرآن ہونے کے ساتھ ساتھ مقبوضہ جموںوکشمیر کی بھارت کے غیر قانونی تسلط سے آزادی کے بڑے حامی اور حریت پسندوں کے استاد تھے کا 29مئی بروز پیر کو انتقال ہو گیا تھا ۔

ورثائے حریت جموں وکشمیر نے ایک بیان میں کہاہے کہ حافظ عبدالسلام بن محمد کی مقبوضہ کشمیر کی آزادی کیلئے خدمات کو ہمیشہ یاد رکھا جائے گا۔بیان میں کہاگیا ہے کہ کشمیری حریت پسند انہیں اپنا استاد مانتے تھے اور ان سے رہنمائی حاصل کر تے تھے ۔

(جاری ہے)

بیان کے مطابق مقبوضہ کشمیر میں بھارتی تسلط سے آزادی کی جدوجہد میں مصروف عمل ان کے سینکڑوں حریت پسند شاگر دوں نے اپنی جانوں کا نذرانہ پیش کیااوران کے ہزاروں شاگر د آج بھی جیلوں میں نظر بند ہیں ۔

سرینگر میں الشیخ حافظ عبدالسلام بن محمد کی درجات کی بلندی کیلئے فاتحہ خوانی اور دعا کی گئی اور سوگوار خاندان اور،ان کے شاگردوں سے دلی ہمدردی اور تعزیت کا اظہار کیاگیا۔ بیان میں ورثائے حریت جموں وکشمیر نے حافظ عبدالسلام بن محمد کو شاندار خراج عقیدت بھی پیش کیا۔ انہوں نے درجنوں کتب تحریر کیں ۔واضح رہے کہ حافظ عبدالسلام بن محمد کا 29مئی کو انتقال ہو گیا تھا اور انہیں اسی روز مریدکے میںسپرد خاک کیاگیا۔