دبئی پولیس نے سیاح کی سمندر میں ڈوبنے والی کروڑوں روپے کی گھڑی ڈھونڈ نکالی

اتوار 2 جولائی 2023 16:35

دبئی (اُردو پوائنٹ اخبارتازہ ترین - این این آئی۔ 02 جولائی2023ء) دبئی پولیس نے سیاح کی سمندر میں ڈوبنے والی 19 کروڑ 5 لاکھ پاکستانی روپے کی مہنگی ترین گھڑی ڈھونڈ نکالی۔غیر ملکی میڈیا کے مطابق دبئی کے رہائشی حامد فہد المیری اپنے دوستوں کے ہمراہ سمندر کی سیر کو ایک کشتی پر سوار ہو کرگئے تھے۔

(جاری ہے)

میڈیا رپورٹس کے مطابق بتایا گیا کہ حامد اپنے دستوں کے ساتھ پام جمیرہ کی سیر کر رہے تھے کہ برطانیہ سے آئے ان کے ایک دوست کی مہنگی ترین رولیکس گھڑی سمندر میں کھوگئی جس کی قیمت 19 کروڑ 5 لاکھ پاکستانی روپے ہے۔

میڈیا کو تفصیلات بتاتے ہوئے حامد نے بتایا کہ برطانیہ سے آئے ان کے ایک دوست نے سمندر میں غوطہ لگایا اور اس دوران ان کی گھڑی ہاتھ سے نکل کر کھو گئی جس پر دبئی پولیس کو مدد کیلئے طلب کیا گیا۔انہوں نے بتایا کہ پولیس غوطہ خوروں کو تمام تفصیلات بتائی گئیں اور پھر وہ سمندر میں گھڑی کی تلاش کیلئے اترگئے اور تقریباً آدھے گھنٹے کی محنت کے بعد بالآخر گھڑی کو ڈھونڈ نکالا۔اس موقع پر سیاحوں کی جانب سے دبئی پولیس کا شکریہ ادا کیا گیا۔