بی جے پی کا مردہ رہنما آخری رسومات میں زندہ ہوگیا

مہیش بگھیل کو اسپتال منتقل کردیا گیا ہے، جہاں ان کا علاج جاری ہے،اہلخانہ

بدھ 9 اگست 2023 13:34

بی جے پی کا مردہ رہنما آخری رسومات میں زندہ ہوگیا

نئی دہلی (اُردو پوائنٹ اخبارتازہ ترین - این این آئی۔ 09 اگست2023ء) بھارت میں حکمران جماعت بھارتیہ جنتا پارٹی( بی جے پی)کے مردہ قرار دیے گئے رہنما اپنی آخری رسومات کی تیاری کے دوران زندہ ہوگئے۔بھارتی میڈیا رپورٹس کے مطابق بی جے پی کے سابق مقامی صدر مہیش بگھیل کو ڈاکٹروں نے مردہ قرار دیا تھا۔مہیش بگھیل آگرہ کے اسپتال میں زیر علاج تھے، طبیعت بگڑ جانے پر ڈاکٹروں نے ان کی موت کی تصدیق کی تھی۔

(جاری ہے)

مہیش بگھیل کے بھائی کا کہنا تھا کہ ڈاکٹروں نے بی جے پی رہنما کو مردہ قرار دیتے ہوئے انہیں گھر منتقل کرنے کا کہہ دیا تھا۔ڈاکٹروں کی جانب سے ہدایت ملنے پر ہم بھائی کو گھر لے آئے اور ان کی آخری رسومات کی تیاری شروع کر دی۔مہیش بگھیل کے بھائی نے بتایا کہ آخری رسومات سے کچھ دیر قبل مہیش کی جانب سے حرکت کی گئی، جب قریب سے دیکھا تو انہوں نے آنکھیں کھولی ہوئی تھیں۔اس موقع پر فورا مہیش بگھیل کو اسپتال منتقل کردیا گیا ہے، جہاں ان کا علاج جاری ہے۔ڈاکٹروں کے مطابق ان کے سینے میں انفیکشن ہے اور انتہائی نگہداشت وارڈ میں زیر علاج ہیں، دوستوں اور اہلخانہ کی جانب سے ان کی صحت کے لیے دعائیں کی جارہی ہیں۔