امریکی خاتون مچھلی کھانے کے بعد ہاتھوں اورٹانگوں سے محروم

تلاپیا قسم کی مچھلی مہلک بیکٹیریل انفیکشن سے آلودہ تھی جس سے خاتون متاثرہوئی،رپورٹ

پیر 18 ستمبر 2023 14:58

امریکی خاتون مچھلی کھانے کے بعد ہاتھوں اورٹانگوں سے محروم

واشنگٹن (اُردو پوائنٹ اخبارتازہ ترین - این این آئی۔ 18 ستمبر2023ء) امریکا میں ایک خاتون مچھلی کھانے کے بعد اپنے دونوں ہاتھوں اور ٹانگوں سے محروم ہوگئی۔غیر ملکی میڈیا رپورٹس کے مطابق امریکی ریاست کیلیفورنیا سے تعلق رکھنے والی ایک خاتون اپنے چاروں اعضا سے اس وقت محروم ہوگئی جب اس نے مبینہ طور پر کم پکی ہوئی تلاپیا مچھلی کا استعمال کیا، یہ مچھلی مہلک بیکٹیریل انفیکشن سے آلودہ تھی۔

میڈیا رپورٹس کے مطابق 40 سالہ خاتون کی دوست کے مطابق گزشتہ ایک ماہ سے متاثرہ خاتون مقامی اسپتال میں زیر علاج ہے اور حال ہی میں ان کی سرجری کی گئی ہے۔متاثرہ خاتون کی دوست کے مطابق خاتون نے مچھلی مقامی مارکیٹ سے خریدی تھی اور گھر میں پکائی تھی اسے کھانے کے بعد خاتون کی حالت غیر ہوگئی اور موت کے منہ میں چلی گئی تھی۔

(جاری ہے)

انہوں نے میڈیا کو بتایا کہ ڈاکٹرز نے متاثرہ خاتون کی بگڑتی ہوئی حالت کے پیش نظر اسے کوما میں ڈال دیا تھا کیونکہ اس کے دونوں ہاتھ، ٹانگیں ، ہونٹ کالے ہوچکے تھے جبکہ دونوں گردے فیل ہو رہے تھے۔

خاتون کی دوست کے مطابق متاثرہ خاتون Vibrio vulnificus نامی مہلک بیکٹیریل انفیکشن کی زد میں آگئی تھی جو کچی سمندری غذا یا پانی میں پایا جاتا ہے۔ اس سے محفوظ رہنے کے لئے ضروری ہے کہ سمندری غذا کو اچھی طرح صاف کرکے اور مکمل طور پر پکاکر کھایا جائے۔