دبئی کا پانی کے اندر تیرتی دنیا کی پہلی اور منفرد مسجد بنانے کا اعلان

تین منزلوں پر مشتمل فنِ تعمیر کے شاہکار کا آدھا حصہ پانی کے اوپر ہوگا، جس میں لوگوں کے بیٹھنے کی جگہیں اور کافی شاپ بنائی جائے گی

ساجد علی جمعرات 21 ستمبر 2023 15:26

دبئی کا پانی کے اندر تیرتی دنیا کی پہلی اور منفرد مسجد بنانے کا اعلان

دبئی ( اُردو پوائنٹ اخبارتازہ ترین ۔ 21 ستمبر 2023ء ) دبئی نے پانی میں تیرتی ہوئی دنیا کی پہلی اور منفرد مسجد بنانے کا اعلان کردیا۔ تفصیلات کے مطابق تعمیرات کے شعبے میں اپنے حیران کن منصوبوں کی بدولت دنیا بھر میں الگ پہچان رکھنے والے متحدہ عرب امارات کے شہر دبئی میں ایک اور منفرد قسم کا پروجیکٹ شروع ہونے جارہا ہے، اس بار دبئی نے پانی کے اندر تیرتی ہوئی مسجد بنانے کے لیے 55 ملین درہم کے منصوبے کا اعلان کیا ہے، اس کا ڈھانچہ بنیادی طور پر تین منزلوں پر مشتمل ہوگا جس میں پانی کے اندر ڈوبے ہوئے ڈیک کو نماز ادا کرنے کے لیے استعمال کیا جائے گا، جس سے نمازیوں کو پانی کے اندر نماز بڑھنے کا انوکھا تجربہ ہوگا۔

خلیج ٹائمز کی رپورٹ سے معلوم ہوا ہے کہ زیر آب سطح پر مسجد کے ساتھ وضو کی سہولیات اور واش رومز بھی ہوں گے جب کہ فنِ تعمیر کے اس شاندار منصوبے کا آدھا حصہ پانی کے اوپر ہوگا، جس میں لوگوں کے بیٹھنے کی جگہیں اور ایک کافی شاپ بنائی جائے گی۔

(جاری ہے)

بتایا گیا ہے کہ دنیا کی اپنی نوعیت کی اس پہلی مسجد کے منصوبے کا اعلان اس وقت سامنے آیا جب دبئی میں اسلامک افیئرز اینڈ چیریٹیبل ایکٹیویٹی ڈیپارٹمنٹ (IACAD) نے اپنے مذہبی سیاحتی منصوبے کے بارے میں بریفنگ دی۔

اس حوالے سے آئی اے سی اے ڈی سے منسلک احمد المنصوری نے بتایا کہ اس منصوبے کی تعمیر جلد شروع ہو جائے گی، یہ ساحل کے بہت قریب تعمیر کیا جائے گا جہاں نمازی زمین سے جڑے ایک پل سے گزرتے ہوئے نماز کی ادائیگی کے لیے مسجد آ جا سکیں گے۔