پاکستان تحریک انصاف نے نگران حکومت کے نجکاری کے فیصلے کو دستورسے انحراف قراردے دیا

اسلام آباد (اُردو پوائنٹ اخبارتازہ ترین - این این آئی۔ 21 ستمبر2023ء) پاکستان تحریک انصاف نے نگران حکومت کے نجکاری کے فیصلے کو دستور سے انحراف قرار دے دیا ۔ جاری اعلامیہ میں ترجمان نے نگران وزیراعظم سے سرکاری خرچ پر دنیا گھومنے کا سلسلہ ترک کرکے انتخاب کے انعقاد کی آئینی ذمہ داری پر توجّہ مرکوز کرنے کا مطالبہ کیا ۔ ترجمان تحریک انصاف نے کہاکہ دستور و قانون نگران حکومت کو طویل المدتی فیصلوں خصوصاً قومی اداروں کی نجکاری و فروخت وغیرہ کا ہرگز اختیار نہیں دیتا۔

ترجمان نے کہاکہ پونے دو ماہ کی حکومت کے دستور و قانون سے ماوراء کسی وعدے پر اعتبارممکن ہے نہ آئندہ منتخب حکومت اس کے کئے گئے ماورائے قانون و اختیار فیصلوں کو قبول کرے گی۔ترجمان تحریک انصاف نے کہاکہ آئینی طور پر 53 روز میں ہوا میں تحلیل ہو جانے والی حکومت کی جانب سے بیچے گئے اداروں کی فروخت کو کسی طور پر جواز اور قانونی حیثیت حاصل نہ ہوپائے گی۔

(جاری ہے)

ترجمان نے کہاکہ نگران حکومت کی جانب سے فروخت کیلئے بروئے کار لائی گئی خود مختار ضمانتوںکی بھی کوئی حیثیت نہیں ہوگی۔ ترجمان تحریک انصاف نے کہاکہ دستور ایسے بڑے فیصلوں کا اختیار کلیتاً عوام کے ووٹوں سے 5 برس کیلئے منتخب ہونے والی حکومت کیلئے خاص کرتا ہے۔ ترجمان نے کہاکہ نگران حکومت کو سمجھنا ہوگا کہ ریاست کا بہترین مفاد دستور کے کامل احترام میں پوشیدہ ہے، آئین و قانون کے مکمل احترام کے بغیر ترقی اور نجات کا کوئی نسخہ کامیاب نہیں ہوسکتا۔

ترجمان نے کہاکہ الیکشن ایکٹ 2017 کا آرٹیکل 230 نگران حکومت کی ذمہ داریوں کا تفصیلی خاکہ پیش کرتا ہے، الیکشن ایکٹ کا آرٹیکل 230 نگران حکومت کو صاف، شفاف انتخابات کے انعقاد میں الیکشن کمیشن کی معاونت کا واحد فرض سونپتا ہے۔ ترجمان کے مطابق الیکشن ایکٹ نگران حکومت کو غیرجانبدار رہتے ہوئے خود کو روزمرّہ کے امور تک محدود رکھنے کا پابند بناتا ہے۔

ترجمان نے کہاکہ الیکشن ایکٹ کا آرٹیکل 230 نگران حکومت کو کسی بھی بڑے معاملے پر فیصلہ سازی سے سختی سے روکتا ہے۔ ترجمان تحریک انصاف نے کہاکہ نگران حکومت کی دستوری مدت مکمل ہونے میں محض 53 روز باقی ہیں، نگران حکومت آئینی حدود سے باہر کود کر ملک و قوم کے مفادات کو ناقابلِ تلافی نقصان پہنچانے کی بجائے قانون کی حدود میں سمٹے۔ ترجمان تحریک انصاف کے مطابق نگران حکومت دستور اور الیکشن ایکٹ 2017 کے آرٹیکل 230 کی روح کی روشنی میں ملک میں صاف شفاف انتخابات کے انعقاد پر توجّہ دے، قومی اداروں کی اندھا دھند لوٹ سیل لگانے کی کسی کاوش کو قوم ہرگز قبول نہیں کرے گی۔ ترجمان تحریک انصاف نے کہاکہ ایسے کسی بھی قدم کو عدالت سے عوام تک ہر سطح پر چیلنج کیا جائے گا۔