وفاقی پولیس نے غیرملکیوں کی ملک بدری پر عملدرآمد کا منصوبہ وزارت داخلہ کو بھجوا دیا

اگر آپ کے گردونواح میں کوئی غیرقانونی غیرملکی رہائش پذیر ہے تو پولیس کو 15پر اطلاع دیں، ترجمان اسلام آباد پولیس کی عوام سے اپیل

جمعہ 22 ستمبر 2023 21:25

․ اسلام آباد (اُردو پوائنٹ اخبارتازہ ترین - این این آئی۔ 22 ستمبر2023ء) اسلام آباد پولیس نے وزیر داخلہ سرفراز بگٹی کے احکامات پر پاکستانی قوانین کے مطابق غیرقانونی مقیم غیرملکیوں کی ملک بدری پر عملدرآمد کا منصوبہ وزارت داخلہ کو بھجوا دیا، غیر قانونی مقیم غیرملکیوں کو ان کے سفارتخانوں کے تعاون سے واپس بھیجا جائے گا۔تفصیلات کے مطابق اسلام آباد پولیس نے پاکستانی قوانین کے مطابق غیرقانونی مقیم غیرملکیوں کی ملک بدری پرعمل درآمد کا منصوبہ وزارت داخلہ کو بھجوا دیا۔

ترجمان اسلام آباد پولیس کے مطابق پہلی باراس ضمن میں قانون نافذ کرنے والے اداروں اور دیگر متعلقین کے کردار کو واضح کیا گیا ہے، غیر قانونی مقیم غیر ملکیوں کو ان کے سفارتخانوں کے تعاون سے واپس بھیجا جائے گا، ضابطہ کار اسلام آباد کی حدود سے امیگریشن کے مراکز تک کے تمام عمل کو واضح کرتا ہے۔

(جاری ہے)

ترجمان کے مطابق ضابطہ کار کے پہلے حصے میں پولیس کے کردار کے مطابق عمل جاری ہے، 21مختلف آپریشنز کے بعد 39مقدمات درج ہیں، 298غیرقانونی مقیم غیر ملکی افراد عدالتوں میں مقدمات کا سامنا کررہے ہیں ۔

گزشتہ روز بھی 17افغان نژاد افراد کو مقدمات کے تحت عدالت کے سامنے پیش کیا گیا، پاکستان میں رہنے کیلئے پاکستان کے قوانین پر عمل لازم ہے۔ترجمان اسلام آباد پولیس کے مطابق غیرقانونی مقیم غیر ملکیوں کو ملازمت، پناہ اور غیر قانونی مدد فراہم کرنا قابل دست اندازی پولیس جرم ہے۔ انہوں نے عوام سے اپیل کی کہ اگر آپ کے گردونواح میں کوئی غیرقانونی غیرملکی رہائش پذیر ہے تو پولیس کو پکار 15پر اطلاع دیں۔