ملائشیا میں مقیم پاکستانیوں کی بےروزگاری کی شرح پر تشویش ہے ۔ سلیم خان بلوچ

کوالالمپور(اُردوپوائنٹ اخبارتازہ ترین۔23ستمبر۔2023ء) ملائشیا پاکستان کے مابین بزنس کے وسیع تر مواقع کو فروغ دینے والی تنظیم MalPak بزنس کونسل کے ایگزیکٹیو ممبر سلیم خان بلوچ ۔ معروف سماجی شخصیت و سینئر نائب صدر پی ٹی آئی ملائشیا سید منیر حسن شاہ ۔ کاروباری ، سماجی شخصیت و سینئر راہنما پی ٹی آئی ملائشیا ملک فاروق احمد ، اور پاکستان پریس کلب ملائشیا کے درمیان کمیونٹی کے شدید ترین مسائل کے حل کے لیے ایک نشست کا اہتمام کیا گیا ۔

جس میں سب سے سرفہرست حالیہ دنوں میں انتہائی حد تک بڑھتی ہوئی بے روزگاری کے حل کی کوشش ، کمیونٹی کی صحت و علاج معالجے کئلیے ایک مستقل پلیٹ فارم کا قیام ، گداگروں کی بھرمار کی روک تھام ، اور ہائی کمیشن سے کمیونٹی کے لیے سہولیات کی فراہمی کے لیے مشاورت تھی ۔

(جاری ہے)

۔MalPak بزنس کونسل کی ترجمانی کرتے ہوئے ایگزیکٹو ممبر و ممتاز بزنس مین محمد سلیم خان بلوچ نے کہا کہ ہمیں ملائشیا میں مقیم پاکستانیوں کی حالیہ بےروزگاری کی شدید لہر پر تشویش ہے ، اور PPCM (پاکستان پریس کلب ملائشیا) کی معاونت سے اس شرح میں کمی لانے کی ہرممکن کوشش کریں گے ۔

نیز پاکستان ہائی کمیشن تک کمیونٹی کی ہر آواز کو پہنچائیں گے ۔ اپنی کمیونٹی کی آسانی کے لیے پاکستان ہائی کمیشن کے اندر دنیا بھر میں اپنی نوعیت کا واحد کمیونٹی سنٹر MALPAK کی کوششوں سے ہی بنایا گیا تھا ، اور ہمارے لیے خوشی کی بات ہے کہ اس آئیڈیا کو کچھ مذید جگہوں پر بھی فالو کیا گیا ہے ۔ معروف سماجی شخصیت و سینئر نائب صدر پی ٹی آئی ملائشیا سید منیر حسن شاہ اور سماجی و کاروباری شخصیت و سینئر راہنما پی ٹی آئی ملائشیا ملک فاروق احمد نے کہا کہ ہم پاکستانی کمیونٹی کی فلاح اور علاج معالجے کے لیے ایک مشترکہ پلیٹ فارم مرتب کررہے ہیں ۔

جہاں سے مستقبل میں اپنی مدد آپ کے تحت اپنی کمیونٹی کے لاچار افراد کے علاج ، جیل میں وطن واپسی کے منتظر پاکستانیوں کے علاوہ دیار غیر میں وفات پا جانے والے ہموطنوں کی وطن واپسی کے لئے مالی معاونت فراہم کریں گے ۔ انہوں نے کہا کہ ہماری ایسے عناصر پر بھی نظر ہے جو پاکستان سے نوکری یا شادی کا جھانسہ دے کر نادار بچیوں کو یہاں بلوا لیتے ہیں ، اور بعد میں ان لڑکیوں کو بے پناہ قباحتوں کا سامنا کرنا پڑتا ہے ۔

ایسا کوئی بھی قدم اٹھانے سے پہلے ان بچیوں کے والدین سے ہماری التماس ہے کہ وہ بلوانے والے عناصر کی مکمل چھان بین کرلیا کریں ، کہ آیا انکا تعلق کسی ایسی کمپنی سے ہے جو نوکری دے رہی ہوں ؟ انہوں نے مزید کہا کہ ملائشیا کے ہر شہر میں موجود پاکستانی گداگروں کی ایک بڑی تعداد یہاں پر مقیم محنت کش یا بزنس پیشہ افراد کی شرمندگی کا باعث بنتی ہے ۔

ہم ذمہ داران سے اس مسئلے کے سدباب کی بھرپور اپیل کرتے ہیں ۔ پاکستان پریس کلب ملائشیا کے صدر اویس تاج چوہدری نے کہا کہ کمیونٹی کے گوناگوں مسائل ہماری نظر میں ہیں ،اور جس طرح ماضی میں کمیونٹی کے مسائل حل کروائے ، اس بار بھی کمیونٹی کے مسائل حل کروانے کے لئے ہر ممکنہ کوشش کریں گے ۔ لیکن اپنے ملکی تشخص کا خیال رکھنا ہر پاکستانی کا فرض ہے ، مشکل وقت میں بھی کوئی ایسا کام نہ کریں کہ ملک کے وقار پہ حرف آئے ۔

انہوں نے بتایا کہ ہم کمیونٹی کے سرکردہ نمائندگان کے ساتھ مل کر ، ہموطنوں کے مسائل کے لیے میکنزم ترتیب دے رہے ہیں ۔ لیکن ہمیں مقامی حالات و واقعات کے ساتھ ساتھ مقامی قوانین کو بھی مدنظر رکھنا ہے ، تاکہ جو بھی اقدام اٹھایا جائے وہ مکمل طور پر قانون کے دائرہ میں ہو ۔ سلیم خان بلوچ ، سید منیر حسن شاہ ، ملک فاروق احمد کے علاوہ مشاورتی اکٹھ میں پاکستان پریس کلب ملائشیا کی طرف سے عرفان لطیف سیفی (چئیرمین PPCM )، جام سیف اللہ (سرپرست PPCM)، اویس تاج چوہدری (صدر PPCM)، سید خرم عباس شیرازی ( سینئر نائب صدر PPCM)، محمد وقار خان (جنرل سیکرٹری PPCM)، شاہزیب شاہ جی (سیکرٹری انفارمیشن PPCM) اور ممبران PPCM میں سے خرم شہزاد ڈار ، معظم عبد الرحمن مغل ، منیر احمد خان ، اور امجد سلطان شامل تھے ۔