امارات میں ملازمت کے خواہشمندوں کیلئے ضروری ہدایات سامنے آگئیں

رعایتی فیس کا لالچ دے کر ویزوں کی پیشکش کر نے والوں کے جھانسے میں نہ آئیں۔ ابوظہبی جوڈیشل ڈیپارٹمنٹ

ساجد علی ہفتہ 23 ستمبر 2023 17:49

ابوظہبی ( اُردو پوائنٹ اخبارتازہ ترین ۔ 23 ستمبر 2023ء ) متحدہ عرب امارات میں ملازمت کے خواہشمندوں کیلئے ضروری ہدایات سامنے آگئیں۔ خلیجی اخبار الامارات الیوم کے مطابق متحدہ عرب امارات میں ابوظہبی جوڈیشل ڈیپارٹمنٹ نے وارننگ جاری کرتے ہوئے کہا ہے کہ رعایتی فیس کا لالچ دے کر فیملی ویزوں کے اجراء کی پیشکش کر نے والے ریکروٹمنٹ کے فرضی ادارے کے جھانسے میں نہ آئیں، فرضی ریکروثٹنگ ایجنسیاں سوشل میڈیا پراشتہار دے کر مقامی شہریوں اور مقیم غیرملکیوں کو بے وقوف بنا رہی ہیں، وہ مختلف عنوانوں سے ابوظبی کے شہریوں اورمقیم غیرملکیوں سے پیسے ہتھیا رہی ہیں اور تاثر یہ دیا جارہا ہے وہ ریکارڈ وقت میں گھریلو عملہ معمولی فیس پر درآمد کرسکتی ہیں۔

معلوم ہوا ہے کہ ابوظہبی کی عدالتوں میں متعدد مقامی شہریوں اور غیرملکیوں نے کیس درج کرائے جن میں انہوں نے فرضی ریکروٹمنٹ ایجنسیوں سے انصاف دلانے کی درخواست کی، اس ضمن میں ابوطہبی جوڈیشل ڈیپارٹمنٹ کی جانب سے کہا گیا ہے کہ کئی افراد سوشل میڈیا پر اشتہار کے جھانسے میں آچکے ہیں۔

(جاری ہے)

ناواقفیت اور معلومات نہ ہونے سے فرضی ریکروٹنگ ایجنسیوں سے رجوع کررہے ہیں، یہ ایجنسیاں اشتہاری مہم میں غیرملکی کارکنان کے ویڈیو کلپ اور تصاویر بھی اپنے اشتہار میں منسلک کررہی ہیں جن سے یہ تاثر مل رہا ہے یہ وہ ورکر ہیں جو ان ریکروٹنگ ایجنسیوں کے توسط سے ابوظبی پہنچے ہیں۔

جوڈیشل ڈیپارٹمنٹ نے اپنے بیان میں مزید کہا ہے کہ بیرون ملک سے معاون عملہ حاصل کرنے کے خواہشمند رجسٹرڈ پرمٹ ہولڈر ایجنسیوں سے رابطہ کریں، فرضی ایجنسیوں سے بچیں، مزید معلومات کے لیے وزارت افرادی قوت و اماراتائیزیشن کی ویب سائٹ سے رجوع کیا جائے۔