سعودی عرب روہنگیا پناہ گزینوں کی مدد جاری رکھے گا، ڈاکٹر الربیعہ

اتوار 24 ستمبر 2023 09:40

ریاض (اُردو پوائنٹ اخبارتازہ ترین - اے پی پی۔ 24 ستمبر2023ء) سعودی عرب کے شاہ سلمان امدادی مرکز کے نگران ڈاکٹرعبداللہ الربیعہ نے کہا ہے کہ سعودی عرب نے بنگلہ دیش اوردیگر ممالک میں روہنگیا پناہ گزینوں کی صحت ، تعلیم اوردیگر ضروریات کے حوالے سے 43 منصوبوں میں بھر پورتعاون کیا۔ سعودی خبررساں کے مطابق ڈاکٹرالربیعہ اقوام متحدہ کے ہیڈ کوارٹر نیویارک میں منعقدہ 78 ویں اجلاس میں شرکت کی جس میں روہنگیا اقلیتی بحران کے حوالے سے اجلاس بھی ہوا۔

انہوں نے مزید کہا کہ تنازعہ کے آغاز سے مملکت نے 2 لاکھ 60 ہزار پناہ گزینوں کی صحت عامہ و دیگر حوالے سے دیکھ بھال کی ہے۔ پناہ گزینوں کے بچوں کی تعلیم کی مد میں 2.25 ارب امریکی ڈالر مہیا کیے۔علاوہ ازیں مملکت نے گزشتہ برسوں میں بنگلہ دیش اوردیگر ممالک میں روہنگیا پناہ گزینوں کے لیے 43 منصوبوں میں 186 ملین ڈالر کی امداد کی جو ان پناہ گزینوں کی صحت، تعلیم اوردیگر ہنگامی امداد سے متعلق تھے۔

(جاری ہے)

انہوں نے مزید کہا کہ 42منصوبوں میں سے شاہ سلمان امدادی مرکز کی جانب سے 25 منصوبوں پرعمل کیا گیا جس کے لیے 25 ملین ڈالر خرچ کیے گئے۔ مرکز کی جانب سے مزید منصوبوں پربھی عمل کیاجارہا ہے۔ انہوں نے یقین دہانی کرائی کہ مملکت عالمی برادری کے ساتھ مل کرروہنگیا کی امداد جاری رکھے گا تاکہ وہ اپنے وطن میں سکون آرام اوراحترام کے ساتھ زندگی گزاریں۔