آئی جی پنجاب کی چینی ٹور آپریٹرز اور سرمایہ کاروں کے ساتھ ملاقات،غیر ملکی شہریوں کی سکیورٹی انتظامات سے آگاہ کیا

منگل 26 ستمبر 2023 19:50

لاہور (اُردو پوائنٹ اخبارتازہ ترین - اے پی پی۔ 26 ستمبر2023ء) آئی جی پنجاب ڈاکٹر عثمان نے چین میں چینی ٹور آپریٹرز اور سرمایہ کاروں کے ساتھ اہم ملاقات کی۔انہوں نے انویسٹرز کو پنجاب میں غیر ملکی شہریوں کی سکیورٹی انتظامات سے آگاہ کیا۔ترجمان پنجاب پولیس نے منگل کو بتایا کہ چینی ٹور آپریٹرز اور سرمایہ کاروں نے پاکستان میں سکیورٹی کی صورت حال پر اطمینان کا اظہار کیا اور حفاظتی انتظامات کو قابل ستائش قرار دیا،چینی ٹور آپریٹرز اور انویسٹرز نے پاکستان میں سیاحت اور سرمایہ کاری کے فروغ کیلئے مکمل آمادگی ظاہر کی، ترجمان کے مطابق آئی جی پنجاب کا کہنا تھا کہ چینی ٹور آپریٹر اور سرمایہ کار دوطرفہ تعاون کو حتمی شکل دینے کیلئے جلد پاکستان کا دورہ کریں گے، چینی وفد پاکستان میں سکیورٹی صورتحال، انتظامات اور محکمہ سیاحت کی سہولیات کا جائزہ لے گا،چینی سرمایہ کاروں نے پاکستان میں مختلف منصوبے شروع کرنے میں دلچسپی کا اظہار کیا اور کہا کہ ان کے دورے سے نئے پراجیکٹس کی راہ ہموار ہو گی،چینی وفد ٹورازم ڈویلپمنٹ کیلئے پنجاب پولیس کے ساتھ ایم او یو بھی سائن کرے گا۔

(جاری ہے)

آئی جی پنجاب نے چینی سرمایہ کاروں کو بتایا کہ پاکستان سرمایہ کاری کے لیے سازگار اور خوبصورت سیاحتی مقامات سے مالا مال محفوظ ملک ہے،بین الاقوامی سرمایہ کاری اور پراجیکٹس کیلئے پاکستان میں سکیورٹی صورتحال مکمل طور پر اطمینان بخش ہے، چینی سرمایہ کاروں کو پاکستان میں نئے پراجیکٹس شروع کرنے میں مکمل پرامن ماحول فراہم کیا جا رہا ہے۔