آسٹریلیا کے ہاتھوں بھارت کی شکست، ورلڈکپ کے آغاز پر کون سی ٹیم آئی سی سی رینکنگ میں نمبر 1 ہو گی؟

بھارت اور پاکستان کی ون ڈے ٹیم رینکنگ پر 5 اکتوبر سے شروع ہونے والے ورلڈ کپ سے قبل کوئی فرق نہیں پڑے گا

محمد علی جمعرات 28 ستمبر 2023 00:11

لاہور (اُردو پوائنٹ اخبارتازہ ترین۔ 27 ستمبر2023ء) آسٹریلیا کے ہاتھوں بھارت کی شکست، ورلڈکپ کے آغاز پر کون سی ٹیم آئی سی سی رینکنگ میں نمبر 1 ہو گی؟۔ تفصیلات کے مطابق بھارت اور آسٹریلیا کے درمیان 3 ایک روزہ میچز کی سیریز کا اختتام ہو گیا۔ آسٹریلیا کی ٹیم بھارت کو تیسرے ایک روزہ میچ میں شکست دینے میں کامیاب ہو گئی، تاہم سیریز بھارت کے نام رہی۔

بھارت اور آسٹریلیا کی سیریز کے اختتام پر سوال کیا جا رہا ہے کہ ورلڈکپ کے آغاز پر کون سی ٹیم آئی سی سی ون ڈے رینکنگ میں نمبر 1 پوزیشن پر براجمان ہو گی؟۔ بتایا گیا ہے کہ آئی سی سی رینکنگ میں بھارتی ٹیم ورلڈ کپ میں نمبر ون جبکہ پاکستان نمبر ٹو کے ساتھ داخل ہو گی۔ بھارت اور پاکستان کی ون ڈے ٹیم رینکنگ پر 5 اکتوبر سے شروع ہونے والے ورلڈ کپ سے قبل کوئی فرق نہیں پڑے گا۔

(جاری ہے)

دلچسپ بات سامنے آئی ہے کہ تاریخی طور پر اعداد و شمار ورلڈ کپ سے قبل پاکستان اور بھارت کے حق میں ہیں۔ 1999ء سے اب تک ورلڈ کپ جیتنے والی ٹیمیں رینکنگ میں ٹاپ دو پوزیشنوں والی ہیں۔ آسٹریلیا نے 1999ء میں ورلڈ کپ جیتا تو وہ رینکنگ میں دوسرے نمبر پر تھا، اسی طرح جب آسٹریلیا نے دوبارہ 2003ء اور 2007ء میں ورلڈ کپ جیتا تو اس کی ٹاپ پوزیشن تھی۔

اس کے بعد بھارت نے 2011 میں ورلڈ کپ جیتا تو ایونٹ سے قبل اس کی رینکنگ دوسری تھی جبکہ 2015ء کے ورلڈ کپ کا فاتح آسٹریلیا اور 2019ء کا فاتح انگلینڈ رینکنگ میں پہلے نمبر پر تھے۔ علاوہ ازیں میزبان ہونا بھی بھارت کے لیے مثبت چیز بتائی گئی ہے کیونکہ حالیہ 3 ورلڈ کپ میزبان ممالک نے جیتے ہیں۔ آئی سی سی نے ریٹنگ سسٹم 1981ء میں شروع کیا تھا تاہم 1975ء اور 1979ء کے ورلڈ کپ کے لیے کوئی ریٹنگ سسٹم نہیں تھا۔ 1983ء کا فاتح بھارت دوسرے اور 1987ء کا فاتح آسٹریلیا چوتھے نمبر پر تھا جبکہ 1992ء کا فاتح پاکستان دوسرے اور 1996ء میں سری لنکا چھٹے نمبر پر تھا۔