21 اکتوبر کو عوام ثابت کریں گے کہ قائد صرف نواز شریف ہیں، مریم نواز کا یوتھ والنٹئیرز سے خطاب

اتوار 1 اکتوبر 2023 17:40

لاہور (اُردو پوائنٹ اخبارتازہ ترین - اے پی پی۔ 01 اکتوبر2023ء) پاکستان مسلم لیگ(ن) کی سینئر نائب صدر اور چیف آرگنائزر مریم نواز شریف نے کہا ہے کہ 21 اکتوبر کو عوام ثابت کریں گے کہ قائد صرف نواز شریف ہیں،نواز شریف پاکستان کو بحرانوں سے نکالنے آ رہے ہیں۔ وہ اتوار کو پاکستان مسلم لیگ (ن) یوتھ والنٹئیرز کے اجلاس سے خطاب کر رہی تھیں۔ مریم نواز کی اجلاس میں آمد پر یوتھ والنٹیئرز نے پرجوش نعروں سے زبردست استقبال کیا ۔

اجلاس میں محمد نواز شریف کے 21 اکتوبر کو استقبال کے حوالے سے مشاورت کی گئی۔ اس موقع پر مریم نواز نے یوتھ والنٹیئرز کے جوش و جذبے کو خراج تحسین پیش کرتے ہوئے کہا کہ نواز شریف بھی آپ اور عوام سے ایسے ہی محبت کرتے ہیں، 21 اکتوبر کو عوام ثابت کریں گے کہ قائد صرف نواز شریف ہیں۔

(جاری ہے)

انہوں نے کہا کہ نواز شریف پاکستان کو بحرانوں سے نکالنے آ رہے ہیں،نواز شریف پاکستان کے زخموں پر مرہم ہے،اللہ تعالی نے ہمیشہ نواز شریف کو سرخرو اور سربلند کیا۔

مریم نواز نے کہا کہ نظام کی اصلاح، عوام کی فلاح نواز شریف کا مقصد ہے۔نواز شریف معیشت بحال اور دہشت گردی کا خاتمہ کریں گے۔ انہوں نے کہا کہ ہمیشہ کہتی ہوں کہ نواز شریف کی دی ہوئی ترقی نکال دیں تو پاکستان میں صرف کھنڈرات بچیں گے، نواز شریف عوام کو مہنگائی سے نجات، نوجوانوں اور مزدوروں کے لئے روزگار، امن اور ترقی کے ایک نئے دور کا آغاز کریں گے۔ مریم نواز نے کہا کہ ہم نے قوم کی خدمت کا ایک لمحہ ضائع کیا نہ آئندہ کریں گے۔ اس موقع پر شرکا نے کہا کہ وہ21 اکتوبر کو اپنے قائد نواز شریف کا بھرپور استقبال کریں گے۔ خواتین عہدیداروں نے کہا کہ وہ اپنے بچوں اور فیمیلیز کے ہمراہ قوم کے مسیحا کو خوش آمدید کہیں گی۔